A afección deportivista está de noraboa. Todo indica que nesta undécima xornada poderá haber un cento de seareiras na bancada da Cidade Deportiva de Abegondo para animar As Nosas deportivistas no seu cruce co EDF Logroño.
Aínda que con restricións de aforo por mor da pandemia de COVID-19, que segue a limitar as actividades deportivas e sociais no país, a chamada #ANosaForza estará #NaNosaCasa alentando a #AsNosas. Contámovolo así usando os cancelos que as searerias e seareiros deportivistas empregan para denominar á afección, cancha e equipo nas redes sociais. Foi aí, nas redes sociais, onde esa masa social seguiu alentando ao equipo pese a falta de resultados. Agora que parece que o xogo do Dépor ABANCA volta coller tono, a afección das futbolistas que adestra Manu Sánchez poderá animar as xogadoras do primeiro equipo feminino en vivo. Algo que abofé que as deportistas agradecerán.
Tal e como informa o Real Club Deportivo, “dentro das esixencias da actual situación e á espera de coñecer se será posible a mobilidade entre concellos para desprazarse até o de Abegondo”, a entidade branquiazul decidiu “activar a organización do protocolo de apertura con aforamento reducido da Cidade Deportiva de Abegondo para o partido de Primeira Iberdrola do próximo domingo ás 12:00 horas entre o Dépor ABANCA e o EDF Logroño”.
Explican desde a praza de Pontevedra que para poder optar a unha das 100 invitacións dispoñibles as persoas socias do www.rcdeportivo.es que o desexen deberán solicitalo formalmente a través da web: http://reservas.rcdeportivo.es, na que deberán introducir os seus datos: nome, apelidos, IDE de socio, 4 últimos números do DNI e correo electrónico.
O conxunto coruñés detalla na súa web que este procedemento “ten tres fins: poder realizar a solicitude da invitación; en caso de adxudicación de invitación e de que se poidan realizar desprazamentos, poder notificar ao socio que ten dereito de acceso á Cidade Deportiva; e, ademais, levar un control de repartición en atención á normativa sanitaria de seguimento da COVID-19“.
Dado o escaso número de localidades dispoñibles, o Real Club Deportivo “roga encarecidamente que unicamente soliciten invitación aqueles Socios que vaian poder acudir o domingo ao partido, para evitar que queden entradas sen utilizar”.
O prazo para pedir os convites remata o venres 11 ás 17:00 h
A solicitude formal debe realizarse antes das 17:00 horas do venres 11 de decembro, momento no que se pechará o prazo de solicitudes de entradas para o regreso do Dépor ABANCA en Abegondo.
Posteriormente ao peche do prazo de solicitudes notificarase, vía correo electrónico, a aquelas persoas que sexan adxudicatarias dunha invitación, que dispoñen de entrada e o método de acceso á Cidade Deportiva.
Protocolo de prevención da COVID-19
Como non podería ser doutro xeito, o acceso, o disfrute do partido e o abandono do recinto levarase a cabo seguindo protocolo de prevención da transmisión do coronavirus SARS-CoV-2.
Indican desde o RCD que para asistir ao partido do Dépor ABANCA, as persoas con convite “deberán ocupar obrigatoriamente a fila e asento asignado para poder ter a todos os afeccionados localizados en caso de rastrexo por COVID-19″.
Tamén por protocolo COVID cada asistente “deberá pasar un control de temperatura, higienizar as súas mans, portar máscara en todo momento, sentar obrigatoriamente na localidade asignada no punto de control de accesos (estará identificada cun adhesivo verde de ASENTO DISPOÑIBLE) e permanecer na devandita localidade sentado até finalizar o partido (unicamente permítense desprazamentos aos baños”.
Advirten desde o RC Deportivo que precisamente por ese protocolo de prevención en Abegondo “non haberá servizo de bar, nin está permitido introducir e consumir alimentos ao interior da Cidade Deportiva), respectando en todo momento a distancia de seguridade de 1,5 metros nos controis de acceso e durante a permanencia no interior da instalación”.
