- Se cadra non te ves correndo a media maratón Coruña21 pero queres dar un paso máis aló de ser simplemente público que sigue a carreira do outro lado do valado, sabes que tamén podes sumarte a esta festa do deporte coruñés como persoa voluntaria?
- A C21 celebra a súa 15ª edición o próximo 12 de febreiro.
Correr é importante e aínda te podes inscribir, pero se polo que sexa non o vas facer nesta ocasión, dispós doutra opción para vivir a carreira, a de axudar a que a proba saia á perfección, unha contribución que é transcendental.
O programa de voluntariado do Concello da Coruña brinda a posibilidade de colaborar coa organización do medio maratón, a facela realidade, a sentir o atletismo doutra maneira.
“Sen o esforzo das persoas voluntarias, a C21 non sería posible. A súa misión é axudar a cada atleta de maneira altruísta e acompañalos/as ata a liña de meta. É outra forma de colgarse unha medalla”, explican desde o Concello da Coruña.
Tamén apoiarán a 5K que se desenvolverá en paralelo e as probas para menores de idade. Ambas son novidade na décimo quinta edición do medio maratón.
Se tes máis de 18 anos, pódeste inscribir para formar parte do voluntariado de Coruña21 a través da seguinte ligazón antes do luns 6 de febreiro ás 14.00 horas. Anímate!