O debut de As Nosas deportivistas esta tempada no Estadio ABANCA-RIAZOR será no Trofeo Teresa Herrera de fútbol. O seu rival será o Valadares de Gaia FC. O club vén de informar sobre como será o proceso de reserva das entradas para o partido das xogadoras que este curso adestrará o técnico Miguel Llorente, que será o mesmo que para o equipo masculino.
O domingo 8 de agosto de 2021 o Estadio ABANCA-RIAZOR acolle a a IX Edición do Trofeo Teresa Herrera en categoría feminina: Dépor ABANCA – Valadares de Gaia FC (17:30 h.) e a LXXVI Edición do Trofeo Teresa Herrera en categoría masculina: RC Deportivo – SD Ponferradina (20:00 h.).
Segundo explica a entidade herculina, “polo momento, o RC Deportivo non coñece o aforo permitido polas autoridades para o evento polo que, inicialmente, ábrese exclusivamente o procedemento de petición / pre-reserva de entradas para o Teresa Herrera“.
A cantidade de público que poderá estar nas gradas do Estadio ABANCA-Riazor estará marcada, polo tanto, pola situación sanitaria da cidade da Coruña, agora mesmo en nivel alto. O club ten que estar pendente das indicacións que o goberno autonómico da Xunta de Galicia facilite para esa data neste tipo de celebracións de caracter deportivo e que poden mudar ao longo desta semana próxima.
Como decíamos, nesta semana o Concello da Coruña está considerado en nivel Alto pola Xunta de Galicia segundo se recolle no DOG do 29/7/21. É por iso que o RC Deportivo non pode, neste momento, outorgar entradas directamente se non que ten que levar a cabo unha pre reserva de localidades á espera do aforo definitivo para estes dous encontros de fútbol.
Así será o trámite de pre reserva de entradas para o Teresa Herrera 2021
As entradas para o debut de Os Nosos e As Nosas como locais na tempada 2021-2022 poderanse conseguir do seguinte modo tal e como explica Dépor:
- Ao ser partido con aforo limitado non se poderá acceder ao Estadio ABANCA-Riazor con carné de tempada senón que será obrigatorio solicitar e ter entrada para o Teresa Herrera 2021.
- A entrada será única. É dicir, será a mesma, para os dous partidos (o feminino, o de As Nosas, e o masculino). Non se poderá facer reserva de localidade por separado para cada un dos dous encotros de fútbol que conforma o Teresa Herrera 2021.
- Só poderán solicitar entrada, sen custo, as persoas socias do Deportivo 2021-2022 que renovasen o seu carné como deportivistas antes do martes 3 de agosto ás 14:00 horas.
- A posibilidade de ter entrada debe xestionarse, exclusivamente, a través do espazo en liña habilitado polo club a tal fin que é este: reservas.rcdeportivo.es
- Todas as persoas socias do RC Deportivo que renoven o seu abono entre a publicación desta información (sábado hoxe 31/7/21) e o 3 de agosto ás 14:00 h. deberán esperar, polo menos, un tempo de 12 horas antes de facer a petición de entrada en: reservas.rcdeportivo.es para que o seu abono renovado apareza no sistema de reserva de localidades do club coruñés como autorizado a poder solicitar invitación de cara ao Teresa Herrera 2021.
- Unha vez pechado o prazo de solicitude de pre reservas de localidades para esta cita deportiva, e coñecido o aforo definitivo que se outorga ao Estadio ABANCA-Riazor para a disputa do Teresa Herrera, notificarase persoalmente a cada persoa peticionaria de entradas se dispón ou non dela e do procedemento, 100% telemático, para poder recibila, así como de todos os detalles para poder facer uso da mesma para o evento.
Cóntanos nas redes, vas reservar a túa entrada para ver As Nosas deportivistas?
Ver esta publicación en Instagram
