Almudena Quereda segue avanzando na súa carreira deportiva. A nadadora do CN Liceo debutou esta fin de semana no seu primeiro Campionato de España de Natación Adaptada por autonomías.
Alí, a nadadora competiu coa categoría S8, acadando dous ouros nos 400L e 200L, e tres pratas, nos 50L ,100L e 200 estilos.
Sobre esta experiencia, a deportista relata a As Nosas que “a vivín diferente. Como esixían unhas mínimas, o nivel que había era moi alto e puiden compartir piscina con outros atletas paralímpicos”.
Na cita, celebrada en Cádiz, a galega tivo a oportunidade de coñecer a Teresa Perales, unha das súas referentes, así como ao nadador Xavi Torres. “Respirábase moita superación na piscina”, recorda.
Almudena Quereda: “Fun ao Campionato Galego e gañei a xente sen discapacidade nas mesmas probas”
Na competición, a coruñesa participou nos 200 estilos e nos 50, 100, 200 e 400 libre, sendo esta última a súa proba principal de cara a unha posible participación nos Xogos Paralímpicos de París 2024.
Entre os postos absolutos desta competición Open, nos 200 estilos, Quereda foi 19ª, cunha marca de 3:50.84. Nos 50ml foi 32ª, finalizando en 41.65. Nos 100ml foi a 28ª clasificada, cunha marca de 1:26.20. Nos 400ml foi novena, con 6:12.45. A súa mellor marca chegou nos 200ml rematando na sétima praza, cun tempo de 3:00.88.
Na categoría S8, a nadadora quedou no top 5, cos seus dous ouros e tres pratas.
En liñas xerais, a nadadora quedou “moi contenta. Baixei as miñas marcas personais na piscina longa”. Así mesmo, a galega conta xa coa súa clasificación funcional: “Déronme a S8, que é unha menos da que tiña provisional, así que moi ben porque con isto xa podemos definir a estratexia e para loitar o que queda de ciclo olímpico, porque é co que vou competir”, explica.
A seguinte proba: Liga Galega Máster
Quereda xa traballa coa mente posta na seguinte cita, a Liga Galega Máster, onde competirá con nadadoras sen discapacidade. A proba celebrarase o 23 de abril e nela a nadadora do CN Liceo estará nas proba dos 100l e 200 estilos.
“Non hai moitas probas onde elixir e esas son as máis “duras”. Así que a por elas e a curtirme”, remata.
