Os vindeiros Xogos Paralímpicos poderían ter a unha nadadora coruñesa na competición. Almudena Quereda, a deportista detrás de A de Atenea, comezou hai pouco tempo na natación adaptada, pero ten por diante un futuro prometedor.
A deportista, agora no CN Liceo, acudiu á piscina como parte da súa rehabilitación tras ter sufrido un accidente que lle deixaría sen a metade da perna dereita. Nunha das súas sesións de autoadestramento, o recoñecido preparador Jesús de la Fuente viuna na auga e ofreceulle ser o seu adestrador.
Da rehabilitación á competición
Antes de ter que recurrir á piscina durante a rehabilitación, Almudena Quereda só nadaba de maneira ociosa. Porén, todo cambiou cando viu que dentro da auga non tiña as limitacións que vivía fóra dela como persoa discapacitada.
“Decátome de que nadando, pois non o fago tan mal e vou á piscina da Solana e vexo que outras persoas sen discapacidade nadaban peor ca min”, recorda. Despois de varias semanas nadando habitualmente, á deportista entráronlle as ganas de meterse no mundo competitivo.
Con todo, isto foi en plena preparación para Toquio 2020, polo que “todas as probas foron burbulla e resultoume imposible inscribirme a algunha para ver onde estaba o meu nivel e a clasificación que teño”. Dentro do deporte discapacitado existen distintas “discapacidades médicas funcionais para poder competir en igualdade de condicións”, explica.
Jesús de la Fuente
Non sería ata abril do 2021 cando Jesús de la Fuente chamaría ás súas portas. “El estaba preparando a unha moza para o Preolímpico de Toquio”, recorda Quereda. Esa moza era María de Valdés, quen estivo moi preto de participar nos Xogos Olímpicos. Pero de Valdés non é a única pupila de de la Fuente. O paralímpico Jacobo Garrido tamén preparou os Xogos con el.
“Segundo o vin súper sarxento e disciplinado, eu dixen vale, esta é a persoa que quero que me adestre. Ademais logo entereime de que ten un palmarés incríble e que ten un deportista, Jacobo Garrido, que ten o récord do mundo de 1500 e 800 libre. El ten un fémur acortado, polo que ten unha limitación parecida á miña, aínda que eu teño máis”, apunta Almudena Quereda, quen non dubidou en poñerse ás ordes de Jesús de la Fuente.
Ver esta publicación en Instagram
Adestrando xa co preparador, Almudena Quereda experimentou unha rápida melloría na súa natación: “A mellora foi brutal. Fun ao Campionato Galego e gañei a xente sen discapacidade nas mesmas probas. Logo en xullo nadei a travesía de 4km de Santa Cruz a Oleiros, sendo eu a única discapacitada, e quedei gañadora feminina. A miña vida deu un xiro radical”, comenta recordando os seus éxitos.
Cos resultados acompañando, Quereda preguntouse: “por que non vou intentar chegar a París?“.
Da inspiración olímpica ao obxectivo paralímpico
O mesmo nome do seu proxecto, @a_de_atenea, tivo inspiración olímpica. “Cando entrei na operación, non sabía se ía sair con xeonllo ou sen el e cando espertei na sala de rehabilitación, que é completamente branca, víñome á mente o Olimpo dos deuses e acordeime de Atenea, que é a deusa da sabiduría e a estratexia en combate”, recorda a nadadora.
Meses despois de iniciar esta nova vida, Quereda adestra co obxectivo de chegar aos Xogos Paralímpicos, aínda que recoñece que é “un proxecto moi ambicioso, pero o meu adestrador cre que podemos chegar. El é o que controla e eu vou detrás facendo o que el me di e dándoo todo”.
Outra dificultade para a deportista do CN Liceo está na reducción do presente curso paralímpico, xa que ao ter que retrasar Toquio 2020, o ciclo de París 2024 é de tres anos en lugar de catro.
Referentes de alto nivel
E precisamente na cidade nipona estiveron competindo o pasado verán algunhas das referentes de Quereda. Un dos nomes que máis destaca é o de Teresa Perales, “a nadadora por excelencia nos Xogos Paralímpicos“, así como Mireia Belmonte. Fóra do ámbito español, a coruñesa tamén pon a mirada na norteamericana Jessica Tatiana Long.
Dentro de Galicia, a deportista menciona a Desi Vila, tamén moi activa nas redes sociais, e a Susana Rodríguez Gacio, “á que coñecín na World Series na Coruña en verán. Conectamos xenial, comezamos a falar por Instagram e paréceme unha persoa incríble a nivel de superación, todo o que conseguiu a nivel deportivo e no ámbito persoal e profesional. No mundo do deporte para discapacitados hai historias de superación brutais e iso motiva moito“.
“A actitude é o único que non nos poden arrebatar”
No seu perfil de Instagram, Almudena Quereda comparte a súa paixón polo ioga e a natación xunto a varias reflexións. Se só tivera que quedar cunha, a nadadora escollería a segunda que publicou: “A actitude é o único que non nos poden arrebatar”.
“Cando chegan os momentos difíciles é complicado pero é o que procuro repetirme. Un mal momento non implica un mal día. Tamén me permito ter momentos malos, porque é humano”, engade a coruñesa, que baixo unha mesma letra une o seu nome, Almudena, o seu proxecto, Atenea, e o seu mantra, Actitude.
