Na vindeira fin de semana Murcia acollerá unha nova edición do Campionato de España de Seleccións Autonómicas de probas combinadas de atletismo na localidade de Alhama. Catro deportistas representarán a Galicia, sendo dúas delas mulleres: Eva Queimaño e Lucía Sánchez del Valle.
A internacional Queimaño, do Bidasoa Atletiko, é campioa de España sub23, un título obtido no ano pasado no aire libre, e competirá na categoría absoluta. Xunto a ela en categoría masculina estará Adolfo Sáinz Maza, do Real Club Celta, tamén internacional e campión autonómico absoluto.
En categoría sub18 estará Lucía Sánchez del Valle, da Escuela Atlética Lucense, subcampioa de España do seu nivel. Con ela competirá Aitor Fernández, do Atletismo Narón, gañador sub20 do Campionato de Galicia de clubs.
A Selección galega elaborada pola Federación Galega de Atletismo enfrontarase aos combinados de Cataluña, Valencia, Castela e León, Murcia, Canarias e País Vasco.
