Pode que o Pontevedra Rugby Club non gañase o primeiro partido da tempada na segunda categoría do oval feminino estatal, pero sen dúbida o grupo sacou leccións moi valiosas do seu debut como equipo. Por exemplo, que queda moito traballo por diante e están dispostas a facelo. Alberto Fernández (primeiro adestrador), Rubén Sanmartín (segundo adestrador) e Sara Antúnez (MVP do PRC) analizan o partido ante o Barcelona Universitari Club (BUC).
Alberto Fernández comeza sinalando o gran reto que supón crear un equipo de rugby para competir a nivel nacional en tempo récord. Só catro semanas tiveron as galegas de pretempada, antes de disputar o que foi o seu primeiro partido como conxunto.
Desta forma, o adestrador sinala que “os primeiros encontros oficiais terán a dobre función de competición e para formar asociacións e confianza dentro do plantel”.
Alberto Fernández (primeiro adestrador do Pontevedra Rugby Club): “Os primeiros encontros oficiais terán a dobre función de competición e para formar asociacións e confianza dentro do plantel”
Unha análise desta primeira xornada disputada coa que coincide o segundo adestrador, Rubén Sanmartín, quen asegura que “se notou o tempo de preparación da competición”. Segundo explica o técnico, o BUC “aproveitou a súa veteranía e calidade na competición”.
Un partido de forzas desiguais
Así comezou o estreo en División de Honor B das galegas. Nos primeiros minutos, segundo Fernández, o Pontevedra RC comezou trabado pero forzando pérdidas de balón cunha “boa actitude ante o placaxe e unha moi fiable melé”.
O talento individual do cadro pontevedrés non se traducía nun bo xogo de equipo, ao que aínda lle falta a “experiencia colectiva”. Pouco durou a igualdade no campo, xa que, tras uns minutos, as catalás facíanse coa posesión e comezaron a alonxar o balón da loita en dianteira, “moi igualada”, atopando “un auténtico filón na á”.
Así chegaron os primeiros ensaios visitantes, mentres que o Pontevedra “non atopaba uha fórmula para pararla”. O BUC dominaba o partido, aínda que o adestrador subliña a boa labor da melé galega, que “seguía dando a talla, dura e fiable nas fases de conquista e extraordinariamente contundente no contacto”.
Notas positivas
Tal e como apunta o seu compañeiro, o segundo adestrador Rubén Sanmartín, hai aspectos positivos detrás da derrota ante o BUC. “Preto das agrupacións somos boas, temos moita calidade nas primeiras liñas e na melé e cando o BUC atacaba polo centro do campo, custáballes moito ensaiar”, analiza.
Rubén Sanmartín (segundo adestrador): “Só queda traballar, traballar e traballar”
Ao mesmo tempo, recoñece que queda camiño por percorrer e que deben “facer reaxustes técnicos en gran parte do equipo”. O resultado foi “duro”, pero recalca que o equipo marcha con boas sensacións. “Só queda traballar, traballar e traballar”, resume Sanmartín desde o corpo técnico do Ponvedra Rugby Club.
Deportividad, compañeirismo e respecto, sinais de identidade do Pontevedra RC
Se algo distingue a este novo equipo de rugby, que une a xogadoras de distintos clubes galegos de Lalín, Vigo, Santiago, Ourense e Pontevedra é o compañeirismo que se respira nas súas filas.
Unha unión que se está a forxar nos adestramentos e seguirá medrando nos seguintes partidos e que fai que o plantel se mostre positivo. “Tivemos a un rival duro e máis experimentado que nós. A pesar disto, plantámoslle cara a unha derrota con moitos puntos a cero, como poucas veces se viu nos campos”, declara Sara Antúnez, nomeada como a mellor xogadora do equipo galego.
Sara Antúnez (MVP do Pontevedra RC): “Ganas de mellorar e aprender desta experiencia”
En resumo, as xogadoras do Pontevedra RC teñen as ideas claras: “deportividade, compañeirismo e moitísimo respeto xunto coas ganas de mellorar e aprender desta experiencia”.
E que, tal e como recorda Alberto Fernández, estas xogadoras “non van desaproveitar a enorme oportunidade de competir na División de Honor B”.
Tropezo no primeiro paso do Pontevedra Rugby que se estrea cunha derrota ante o BUC (0-94)