Parte dos equipos galegos da LF2 sitúanse na parte inferior da táboa, onde compiten por evitar o descenso. Dous deles son o CB Arxil e o Ulla Oil Rosalía, que se verán as caras este sábado, 23 de xaneiro, ás 19:30 horas no marco da décimo sexta xornada.
Un punto separa a pontevedresas e compostelás, que están a afrontar esta segunda volta dándoo todo por non descender. As primeiras ocupan a undécima posición e as segundas a décimo terceira.
O Arxil xogará en casa con confianza
As verdes volven competir en casa, onde perderon un partido a fin de semana pasada rompendo a súa racha de trunfos xogando como locais. O encontro ante o Ibaizabal foi a segunda derrota da semana pasada, pero isto non acaba coa moral e cos ánimos do Arxil.
O equipo dirixido por Maite Méndez afrontan este duelo con confianza polo xogo mostrado nas anteriores citas. Nunha delas estiveron a piques de vencer ao Celta Zorka Recalvi, un dos mellores conxuntos da categoría, que tivo que sufrir ata o último minuto para levarse os dous puntos.
Para este sábado, as pontevedresas xa non poderán contar con Bineta Ndoye nas súas filas, debido á rescinsión do seu contrato. Desde o club verde informan de que están traballando nun recambio e que teñen “varios nomes na mesa” e non queren “precipitarse”.
O Rosalía busca deixar atrás a mala racha
Polo bando santiagués, o Rosalía de Chiqui Barros chega nun punto moi delicado. Malia as melloras no seu xogo en equipo son o cadro que máis derrotas leva de maneira consecutiva. As compostelás non coñecen a vitoria desde hai seis xornadas.
Gañar para deixar de ocupar a penúltima posición é vital para as novatas da liga de prata, que está vendo como a súa inexperiencia pasa factura. Pero isto non é motivo suficiente para que as brancas non poidan dar a sorpresa.
Con vitorias ás súas costas como as acadadas contra o Barakaldo e case trunfos como os partidos ante Azkoitia Azpeitia e Osés Construcción Ardoi, as xogadoras do Rosalía farán todo o posible por levarse este partido.
Ademais, ao día seguinte, as de Barros teñen outra cita. As compostelás recuperarán a décima xornada ante o Magec Tías, colista e tamén rival directo na loita pola permanencia.
O aforo para este encontro de LF2 que se celebra no CGTD de Pontevedra será de 60 persoas. A afección poderá seguilo tamén vía streaming no Canal FEB.
