O debut con público na grada do Club Balonmán Atlético Guardés foi unha vitoria diante do Uneatlántico Pereda por 33-19. A Sangriña puido animar ás súas e gozar dun triunfo. Nos accesos e na grada houbo que respectar as indicacións para previr o contaxio da COVID-19.
1-3. Ese era o resultado que reflectía o marcador da Sangriña ao fío do minuto cinco de partido. O Guardés empezou aos tombos, con moitos erros de lanzamento e con dificultades para mostrar solidez en defensa. Pero todo foi un espellismo.
As de Prades empezaron entumecidas diante da súa afección, sen atoparse a gusto na pista diante dun Uneatlántico Pereda que expuña unha defensa seria e tomábase o seu tempo para cociñar os ataques.
Co paso dos minutos, o Guardés comezou a facerse grande, protexido baixo paus por unha espectacular Marisol Carratú (11 paradas no primeiro acto). O ataque empezou a carburar con Arcos e Santiago como referentes e aínda que as cántabras buscaban de maneira incesante a Almeida no pivote, o alirón local (do 8-8 ao 14-8 na primeira parte) xa foi insalvable.
Os primeiros minutos do partido estiveron marcados polos erros e as imprecisións. Os dous equipos empezaron nerviosos pero o Pereda conseguía sacar rédito dirixidas por Aida Brull. O 1-3 foi a máxima renda visitante e grazas a Carratú en portaría e un pouco máis de atino ante Sol Ceballos, a gardameta visitante, o partido igualouse con gol de Arcos (3-3).
Lorena Pérez fallaba dous lanzamentos case consecutivos e deixaba paso a Morais. Tamén Lima íase ao banco e entraba Rajnohová e entre o duelo de porteiras empezou a xurdir Paula Arcos para marcar o camiño guardés.
Houbo tempo morto de Santiago Abascal no 16:14 co 7-6 pero a pesar de que o Pereda quería impregnar o seu ritmo ao partido e explotar a Almeida no pivote o Guardés con Arcos e Santiago como referentes empezou a atoparse máis cómodo.
Quixo Prades deter o partido no 21:13 para reorganizar defensa, sobreporse aos minutos en inferioridade e asentar aquilo que estaba a funcionar mellor. As rotacións ían alternando os minutos de protagonismo para as locais, Morais anotou (12-8) e Pérez conseguiu desquitarse (13-8).
O Guardés empezaba a ir como un tiro e o 8-8 deixou paso a un 14-8 con Carratú acumulando paradas (11 no primeiro tempo) e conseguindo que o traballo das súas compañeiras en ataque cobra-se máis peso. O Pereda, mesmo coas ideas claras e sabendo como pór en apertos ao Guardés, tentou cambiar o seu defensa para manterse no partido pero sen éxito. Ao descanso, a renda xa era de sete goles.
A tónica durante o seguintes trinta minutos foi similar. Houbo repartición de minutos entre as locais, Sempere en portaría, Descalzo entrou ao pivote para dar descanso a unha Carla Gómez que está a dobrar esforzos e Barbosa tamén se deixou ver no extremo esquerdo.
Houbo bos detalles en ambos os equipos, pero os do Pereda, que seguía tentando dar coa tecla guardesa, foron eclipsados por máis paradas, máis lanzamentos bonitos de Pérez, Arcos, Santiago, Buforn, Lima e a defensa cortocircuitando as ideas visitantes.
Do 20-13 pasouse ao 26-13 e non houbo moita máis historia até o 33-19 a pesar de que as de Santi Abascal baleiráronse sobre a pista.
FICHA TÉCNICA
33 CLUB BALONMÁN ATLÉTICO GUARDÉS (18+15): Sandra Santiago (5), Lorena Pérez (6), Estefanía Deas-calzo (2), Miriam Sempere, Paulina Pérez (5), Patrícia Lima (5) , Cristina Barbosa, Paula Arcos (7), Carla Gómez, Marisol Carratú, Erika Rajnohová, Laura Morais (1) e Daniela Moreno (2).
19 UNEATLÁNTICO PEREDA (11+8): Marta Sainz, Danielle de Sousa (2), Sandra Rodríguez (3), Andrea Pellón (2), Lydia Branco, Sheila Hiraldo, Verónica Berastain, Paula González (1), Yadira Morais (3), Sol Ceballos, Leire Carcamo, Claudia Sáez, Aida Brull (1), Belén Sáez (4), Alba Fernández e Isaura de Almeida (3).
RESULTADO CADA 5 MIN: 1-2, 4-4, 6-5, 9-8, 14-8, 17-11 (descanso), 18-11, 20-12, 21-13, 25-13, 28-14, 30-16, 33-19 (final).
ÁRBITROS: Rafael Alberto García Mosquera (Andalucía) e Alberto Rodríguez Rodríguez (Galicia). Excluíron por parte das locais a Paula Arcos (2), Sandra Santiago e Carla Gómez e das visitantes a Sheila Hiraldo.
INCIDENCIAS: partido correspondente á Xornada 3 do Grupo A da liga Guerreras Iberdrola disputado na Sangriña con espectadores. Asistiron ao palco o alcalde da Guarda, Antonio Lomba; a concelleira de Deportes, Montse Magallanes; e o deputado provincial, Gorka Gómez.
RESUMO DO PARTIDO NA SANGRIÑA EMITIDO POLA TVG
Vitoria clara do @Atlguardes_ofic na Sangriña diante do @bmpereda
3⃣3⃣-1⃣9⃣ foi o resultado final
Paula Arcos, con 7 goles, e Lorena Pérez, con 6, foron as máis certeiras. pic.twitter.com/FkU2GlnCmk
— En Xogo tvG2 (@EnXogo_tvG2) October 10, 2020