O público está de volta na Sangriña. Unha das mellores noticias das últimas semanas para o Atlético Guardés que por fin poderá gozar coa súa afección tras permitir a Xunta de Galicia que as instalacións deportivas cubertas completen até un 30% do seu aforamento sempre cun máximo de 250 persoas.
A situación epidemiolóxica da Guarda é máis favorable e entre Concello e club decidiuse aproveitar o levantamento de restricións na comunidade autónoma para que aos poucos os socios poidan ir volvendo ao pavillón e animar ao equipo de Prades, que xustamente na tarde de hoxe, sábado 27 de febreiro, recibe ao CICAR Lanzarote – Cidade de Arrecife (19:00 horas, emitido por streaming) na penúltima xornada da primeira fase de liga.
“O máis positivo do fin de semana será a volta da nosa xente, a presenza de público na bancada”, celebraba o técnico. José Ignacio Prades é coñecedor do importante que é sempre o apoio da afección guardesa e de maneira máis especial ante os bonitos retos que o persoal ten aínda por diante: fase polo título de liga, a eliminatoria da segunda rolda da Copa da Raíña e as semifinais da EHF European Cup.
Cun ambiente caloroso na bancada e o xute de moral da vitoria contra o Rincón Fertilidad Málaga, o Guardés vivirá mañá un choque ben diferente. O San José Obrero, antepenúltimo no grupo A, tan só conseguiu tres vitorias no que vai de tempada e parece estar xa condenado a continuar o seu camiño no grupo polo descenso.
Na primeira volta as galegas impuxéronse ao equipo de David Betancort por 20-26. Pero máis aló destes números, Prades advirte: “San José Obrero vén xogando moi ben”, apunta. Por exemplo, nos seus partidos máis recentes caeron tan só por tres goles contra Zubileta Evolution Bm. Zuazo (26-23) e Aula Alimentos de Valladolid (24-26) levando a iniciativa en boa parte do partido.
“O Lanzarote ten un equipo moi competitivo, con xogadoras contrastadas na categoría”, lembra Prades, “e tras axustarse é evidente que han ir a máis”. Entre as súas pezas crave: Priscila dos Santos, Pessoa, a ex do Guardés Gabriela Romeu, Alicia Torres ou o reforzo de inverno: Celia López. A plantilla de Betancort ten a dúbida de Nagore Saenz, que onte volveu resentirse da súa lesión de ombreiro despois dun forte golpe e non puido participar en todo o partido contra a aula desde o minuto 8 da primeira parte.
En canto ao estado das xogadoras do Atlético Guardés, o preparador do equipo, Jose Ignacio Prades, está pendente de novo de Paula Arcos. Sinala que por fin o equipo “acumula ritmo, o que todos os conxuntos necesitan para desenvolver o seu xogo e traballo, e tamén boas sensacións”, apunta.
“Estamos nun momento bo, preparámonos para isto e estou contento porque o equipo está a responder a nivel físico”, comenta o técnico das galegas en relación ao maratón de compromisos dentro do cal está inmerso o conxunto do Atlético Guardés.
“Estamos no ecuador, aínda nos quedan catro partidos”, lembra José Ignacio Prades. E é que ao Atlético Guardés aínda queda antes de tomarse un pequeno respiro unha viaxe a Lanzarote, a visita ao Rincón Fertilidad Málaga e un novo desprazamento a Barakaldo para o partido de ida da segunda fase da Copa da Raíña co Zubileta Evolution-Bm. Zuazo.
Antes de pensar en todo iso, na Sangriña vivirase hoxe un partido case de transición, con dous puntos en xogo que non afectan máis aló do anecdótico nin ás aspiracións dunhas nin doutras, con ambos os conxuntos marcando obxectivos da tempada ben distantes.
O calendario do Guardés vaise axustando
Dous partidos réstanlle ao Guardés ademais do de hoxe, sábado, para pechar a primeira fase da tempada. O mércores 3 de marzo, as de Prades viaxan ás Illas Canarias para recuperar co Lanzarote – Puerto del Carmen a oitava xornada de Liga Guerreras Iberdrola (20 h, Pab. Mpal de Tías) que se aprazou en xaneiro por casos de covid-19 no conxunto lanzaroteño. O sábado 6 chega a xornada 14 cun importante compromiso: a visita á Polideportivo Ciudad Jardín para medirse ao Rincón Fertilidad Málaga (18:30 horas), contra quen o Atlético Guardés xa se apuntou unha vitoria esta tempada (23-22, xornada 7).
O mércores 10 de marzo, o Atlético Guardés desprazarase até Barakaldo para xogar en Lasesarre o partido de ida da eliminatoria da segunda fase da Copa da Raíña. O conxunto galego e o Zubileta Evolution-Bm. Zuazo terán que buscar unha nova data para o choque de volta tendo en conta que o Comité Nacional de Competición aprobou o seu adiamento.
O partido estaba fixado para o sábado 13 de marzo ás 19 horas na Sangriña pero a convocatoria de xogadoras como Paula Arcos co ‘Obxectivo 2021’ ou Rajnohová coa selección de Eslovaquia motivaron a solucitude por parte do equipo do Baixo Miño.
Despois chegará unha semana sen competición pola actividade internacional antes de iniciar a pelexa no grupo polo título. Aínda sen coñecer a orde no cal Atlético Guardés se medirá aos seus novos rivais, as de José Ignacio Prades unicamente teñen fixado no calendario o partido de ida das semifinais da EHF European Cup contra o Rincón Fertilidad Málaga o domingo 28 de marzo ás 20 horas.
O partido desta tarde na Sangriña contra o CICAR Lanzarote Ciudad de Arrecife será arbitrado polos colexiados Francisco Fernández Ferreiro e Adrián Rodríguez Valdés (Asturias). Está previsto que asistan ao cruce direferentes personalidades como é o caso do alcalde do Concello de A Guarda, Antonio Lomba, a concelleira de Deportes do municipio, Montse Magallanes, o deputado provincial, Gorka Gómez, así como o Secretario Xeral para o Deporte da Xunta de Galicia, José Ramón Lete Lasa.
Podes seguir o partido entre Atlético Guardés e Club Balonmano San José Obrero na canle de YouTube
