O Concello da Coruña construirá un skatepark e unha pista multideportes na praza José Toubes Prego en Catro Camiños, nunha zona situada baixo o viaduto da avenida de Alfonso Molina. O proxecto, que inclúe e urbanización da praza, conta cun orzamento de licitación de 316.097,99 euros.
Segundo informa o concello coruñés redeseñouse por completo o anterior plan que só incluía a posta en funcionamento dunha pequena pista de skate. Agora amplíase a actuación cun skatepark máis amplo e a construción ademais dunha pista multideporte e a urbanización de toda a contorna da praza.
Con esta actuación, facilítaselle á veciñanza coruñesa novos espazos urbanos de calidade tanto para uso deportivo como para uso lúdico. “Trátase de dinamizar o barrio e dotalo de maiores servizos”, dixo a alcaldesa, que lembrou o seu compromiso de que todos os barrios dispoñan de instalacións.
Inés Rey, alcaldesa da Coruña: “Trátase de dinamizar o barrio e dotalo de maiores servizos”
A zona da actuación ten unha superficie de 1.504 m2. O skatepark ocupará aproximadamente unha superficie 400 m2, a cancha de baloncesto coas súas bancadas ocupará 361 m2, e a praza peonil 176 m2. A superficie restante corresponde ás beirarrúas, zona axardinada e novo paso peonil.
Desde o Goberno local sinalan que con esta infraestrutura as persoas practicantes de deportes urbanos como skater, bmx, scooter e roller, así como de baloncesto, disporán dunhas instalacións apropiadas.
Explican desde o Servizo de Infraestruturas do Concello da Coruña que se trata dun lugar adecuado para practicar o este tipo de modalidades deportivas, que non suporá unha molestia para a veciñanza da contorna.
Pensado para diferentes niveles na práctica do skate
Segundo as persoas responsables do proxecto, o trazado do skatepark busca que todas as persoas usuarias segundo a idade, modalidade e experiencia poidan practicar a disciplina. Por iso, tamén inclúe elementos innovadores con fin de que as persoas con menos experiencia na práctica deste deporte poidan acadar unha evolución superando diversas etapas.
/ CONCELLO DA CORUÑA
O skatepark proxectado conta ademais con diferentes tipos de planos inclinados e ramplas, e ofrece un amplo abano de posibilidades de movementos, piruetas e acrobacias para distintas disciplinas.
Pista deportiva con catro canastras e con bancadas
Canto á pista deportiva, deseñase unha área de baloncesto coa instalación de catro canastras e bancadas para o descanso e goce das persoas usuarias de ambas as disciplinas deportivas.
/ CONCELLO DA CORUÑA
Outro dos obxectivos desta actuación, segundo explican desde o Concello da Coruña é mellorar accesibilidade na zona, e por iso se reformarán as beirarrúas e se habilitará un novo paso peonil na rúa Fernando Rey con rede semafórica.
Tamén se mellora a contorna das pistas proxectadas e créase unha praza peonil. A intención, sinalan, é que a nova praza se converta nun espazo de encontro e de tránsito, unha zona máis verde e sustentable, que disporá de bancadas e creará unha zona de lecer, e dun banco axardinado, que fai a súa vez de separación respecto ao tráfico existente na zona.
