O Atlético Guardés vivirá o vindeiro domingo 28 de marzo unha cita histórica na súa cancha da Sangriña (Galicia): o partido de ida das semifinais da EHF European Cup e espera facelo co maior número de afeccionados posible nas súas bancadas. Para iso o club propón, “desde o respecto á situación epidemiolóxica” motivada pola COVID-19, optar polo protocolo vixente en Galicia que vén marcado pola Xunta e permitiría até un máximo de 250 persoas no Inferno.
Mentres a Xunta de Galicia é sensible á situación epidemiolóxica particular case de cada localidade por mor da COVID-19, a Federación Europea de Balonmán remitiu no verán aos clubs un protocolo unificado a seguir en todas as instalacións deportivas que acollan competición europea.
Aínda que é certo que o documento é vivo e viuse actualizado con data 1 de febreiro de 2021, na súa última versión non recolle novidades en relación á presenza e localización dos espectadores no pavillón. Un pavillón que debe contar con cinco áreas delimitadas e entre as cales non debe haber ningún tipo de cruzamento ou interferencia.
A EHF non contempla, por exemplo, a presenza de espectadores na bancada localizada detrás dos bancos, limitando esta zona a oficiais e medios de comunicación. Na bancada oposta si que se poden sentar afeccionados, pero o organismo europeo elimina os tres primeiros metros de asentos ou na súa falta o tres primeiras filas. Medidas que tamén afectan as zonas traseiras das portarías, onde agora o Club Balonmano Atletico Guardés conta cunha bancada supletoria instalada recentemente polo Concello da Guarda.
O Guardés pídelle á EHF usar o protocolo de Galicia
É por iso que o Club Balonmán Atlético Guardés non dubidou en solicitar de maneira formal á Federación Europea de Balonmán vivir dunha maneira máis especial este día histórico no Baixo Miño. De feito, esta será a primeira vez que o equipo de División de Honra xogue as semifinais dunha competición continental. Esto acontece tras nove anos na máxima categoría do balonmán feminino español e oito tempadas competindo de maneira consecutiva en Europa. Polo que a cita é para o conxunto galego un momento histórico na súa traxectoria competitiva continental. Na entidade guardesa desexan, respectando as medidas de prevención, poder vivilo coa afección do mellor xeito posible.
Nesta ocasión, o rival das galegas da Guarda será o conxunto español do Rincón Fertilidad Málaga e o horario do choque de ida na Sangriña xa foi posto en coñecemento da EHF European Cup o xoves 25 de febreiro: domingo 28 de marzo ás 20:00 horas.
Desde que deu inicio a tempada 2020 – 2021 marcada pola convivencia coa pandemia de COVID-19 que xa marcara o final do anterior curso 2019 – 2020, o Club Balonmano Atlético Guardés traballou cada día en que tanto a plantilla sénior como xogadoras das categorías base, así como institucións, patrocinadores e afeccionados poidan seguir gozando do balonmán feminino con todas as garantías sanitarias que son posibles durante esta situación.
É por iso que contando cun protocolo para os recintos deportivos na comunidade autónoma galega marcado pola propia Xunta de Galicia, a entidade guardesa “cursou esta solicitude desde o máis absoluto respecto á situación sanitaria actual e tendo en conta que desde hai unhas semanas permítese de novo a presenza de afeccionados en instalacións deportivas pechadas até un máximo de 250 persoas. E dada a ilusión coa que o club afronta este novo reto deportivo, nada o faría máis bonito que contar con toda a axuda posible do Inferno da Sangriña”.
O Guardés fai historia pasando por primeira vez a semifinais na EHF European Cup
