As Guerreras da Selección Española de balonmán caeron derrotadas ante Dinamarca por un tanteo de 30-27 (16:14 no descanso). O partido amigable, disputado no Royal Stage de Hillerød, é o primeiro dos dous compromisos que afrontará España en territorio danés esta semana. O protagonismo galego desta cita veu dado polo debut de Paula Arcos, xogadora do Atlético Guardés, e pola efectividade anotadora de Alicia Fernández. A de Valdoviño foi a máxima goleadora do partido con 9 goles. Ademais foi elixida mellor xogadora da Selección neste encontro.
O combinado español comezaba o choque con dificultades, ante unha contundente defensa 6:0 exposta polo conxunto de Jesper Jensen. A galega Alicia Fernández encargábase de botarse ás costas ao equipo no plano ofensivo. A iniciativa en todo momento era para Dinamarca, chegando a alcanzar rendas de 4 goles.
Superado o ecuador do primeiro acto, Carlos Viver paraba o partido coa intención de reverter a situación, e aos poucos a selección española lograba temperar as acometidas danesas. A renda baixaba até os 2 goles, e a pesar de sufrir unha exclusión de Soledad López, as Guerreras seguían mellorando as súas prestacións, atacando con continuidade e logrando conectar co pivote cando se abrían espazo, conta a Federación Española de Balonmán na súa crónica do partido.
Debutaban neste partido Nicole Wiggins, Paula Arcos e Ona Vegué, e mesmo estas dúas últimas lograban estrearse como goleadoras coas Guerreras.
Ao descanso, desvantaxe pequena para a selección española (16:14), que arrincaría a segunda metade cunha xogadora menos por exclusión de Eli Cesáreo.
O arranque do segundo tempo confirmaba as boas sensacións das Guerreiras, que cada vez atopaban mellores solucións para superar a retagarda danesa, a pesar de sufrir varias exclusións ao longo dos segundos 30 minutos. Tal era así que mesmo, alcanzado o minuto 45, España púñase por diante por primeira vez (20:21), obrigando ao seleccionador danés a pedir tempo morto.
Dinamarca reaccionaba ao golpe da selección española, e no seguinte parcial xa estaba de novo por encima no marcador (24:23). Só nos compases finais as locais eran capaces de romper o partido, aínda que sen chegar a lograr unha cómoda renda, pero si suficiente para amarrar unha vitoria ante España (30:27).
Traballado encontro para as Guerreras que loitaron de principio a fin ante unha selección que vén de ser cuarta no último Campionato de Europa.
O segundo dos amigables programados ante Dinamarca se disputará mañá sábado, a partir das 16:10 horas.
