O CV Arenal Emevé comeza a formar o plantel para a vindeira tempada da mellor forma. Lucía Prol regresa ao vestiario das loitadoras, despois de gañar a Liga Iberdrola e a Copa da Raíña co CV Haris da Lagoa.
Segundo informa o club galego, a xogadora lucense é a primeira pedra do proxecto que dirixirá esta campaña Manuel Blanco. O regreso da internacional española supón un primeiro piar ilusionante dun equipo que terá moito ADN Emevé.
Poucos exemplos diso mellores que a propia Lucía Prol para ilustralo: chegou ás categorías inferiores do club con oito anos e a seguinte será a novena tempada no primeiro equipo das loitadoras. Toda unha vida de pertenza a esta familia coa única excepción da tempada pasada na que, nas filas do CV Haris, gañou dous títulos nacionais e disputou a final dunha competición europea, a CEV Challenge Cup.
Prol volve con ambición ao Emevé
A capitá do Arenal Emevé móstrase ambiciosa no seu regreso e afirma que “veño dunha tempada exitosa e chea de aprendizaxe, por iso volvo a casa, porque quero gañar coa miña xente.” A primeira oportunidade para tentalo teraa ante o que xa é o seu ex equipo, xa que a vitoria das Laguneras na liga Iberdrola fará que estas se enfronten ás loitadoras na Supercopa.
Este duelo será unha reedición da final da Copa da Raíña, un torneo que espertou a espiral de Lucía Prol por volver a casa: “O vivido no Municipal foi espectacular, emocionante. En todo momento estiven centrada en defender as cores do que era o meu equipo, ao que estarei eternamente agradecida por todo o que me deu esta tempada, pero ver ás que toda a miña vida foron as miñas compañeiras recollendo a medalla de prata fixo click na miña cabeza. Deime conta de que quería poder pelexar polo ouro con elas”.
Prol: “Ver ás que toda a miña vida foron as miñas compañeiras recollendo a medalla de prata fixo click na miña cabeza”
Con todo, Prol insiste no agradecemento ao club canario: “Estou contenta por regresar a casa, pero triste por deixar un gran proxecto. Desde o primeiro día todo o mundo deume todas as facilidades e apoio, só podo estar agradecida a todo o gran grupo humano que conforman directiva, staff, traballadores, xogadoras e afeccionados do CV Haris”, declarou ao seu club, o Emevé.
Manuel Blanco: “Recuperar a Lucía é unha forma excepcional de empezar a confeccionar o noso equipo”
O que será o seu adestrador esta tempada, Manuel Blanco, celebra tamén o retorno de a receptora lucense: “Recuperar a Lucía é unha forma excepcional de empezar a confeccionar o noso equipo: por calidade humana e deportiva é a líder que necesitamos”. A gran capitá xa está na casa e é a primeira pedra dun grupo que buscará ilusionar á afección lucense tanto como o fixo na emocionante tempada pasada. .
