O Comité Técnico Galego de Árbitros de Fútbol (CTGAF) organizou este sábado 9 de maio, en Vigo, a segunda xornada do Programa formativo ACTA Máster (Arbitraxe Con TAlento), na que participaron 24 árbitros menores de 20 anos das categorías de Primeira e Segunda Futgal, ademais tamén se organizou unha xornada formativa de arbitraxe feminino con quince árbitras. Unha xornada para a formación do colectivo arbitral.
O programa representa a evolución natural do proxecto Arbitraxe con Talento, agora transformado nun máster orientado á profesionalización e ao desenvolvemento integral dos árbitros e árbitras galegos. Este novo formato reforza o compromiso coa excelencia formativa e coa creación dun modelo de referencia dentro da arbitraxe galega, segundo informa a Real Federación Galega de Fútbol (RFGF)
O seu obxectivo é formar persoas e árbitros con capacidade de liderado, coherencia, e compromiso coa arbitraxe e o deporte. Esta tempada, que é a súa décima edición, o programa amplía a súa formación a dous anos, 2026 e 2027.
A actividade comezou na sede da RFGF en Vigo, coa benvida do presidente do CTA da RFEF Fran Soto e o presidente do CTGAF Bernardino González, quen lles deron uns importantes consellos. O responsable do programa Roberto Vázquez, o director técnico Julio Amoedo e a árbitra de Primeira Federación Feminina Selina Álvarez, foron quen deron as súas charlas aos máis xoves.
A responsable da arbitraxe feminina Elena Casal abriu a xornada formativa feminina na que participaron a psicóloga María Alfageme e a xogadora de As Celtas Sara Debén.
Adestramento arbitral en Coia
Pola tarde, a actividade trasladouse ao campo de fútbol de Coia para a realización da parte práctica da xornada, dirixidos polos membros da xunta directiva do CTGAF.
Os árbitros realizaron un adestramento con varias estacións nas que os xoves colexiados tiñan que realizar diferentes exercicios.
As árbitras realizaron un adestramento dirixido pola preparadora física Andrea Vares.
