- O Club Waterpolo Pontevedra retoma a competición oficial tras o longo parón do Nadal, con partidos de ligas galegas e na Primera Nacional feminina.
A liga Nacional Feminina de Waterpolo volve esta fin de semana tras o parón do Nadal dun mes. O Club Waterpolo Pontevedra viaxa hoxe, sábado 14 de xaneiro, a Madrid (Piscina M86) para disputar a novena xornada fronte ao Club Natación Ciudad de Alcorcón (18:30 h). As galegas afrontan así o segundo partido da segunda volta do seu primeiro ano nunha categoría estatal.
O equipo madrileño, por obras na súa piscina, desprázase nesta ocasión á piscina do Centro de Natación M86. Nese escenario circunstacial, as galegas esperan facer un bo partido e resarcirse da segunda xornada de liga, na que pagaron a novatada perdendo no último minuto.
Espérase un partido complicado fronte a un equipo madrileño que contará co factor casa e o público ao seu favor, pero as xogadoras do Club Waterpolo Pontevedra saltarán como sempre á auga en busca da vitoria.
O seguimento do resultado do partido poderá facerse como sempre desde a web da RFEN.
Nas ligas galegas enfróntanse CW Santiago e Club Waterpolo Pontevedra
Tras o longo parón do Nadal, as ligas Galegas de Waterpolo volven esta fin de semana, cun desprazamento e tres partidos para o Club Waterpolo Pontevedra.
O club do Lérez viaxa a Santiago de Compostela (piscina Santa Isabel) para medirse ao CW Santiago en ligas alevín e absolutas.
O primeiro partido da xornada (15:45 h) será o de Liga Galega Alevín Mixta, onde o equipo masculino do CW Pontevedra disputará o seu cuarto partido da tempada. Espérase un partido emocionante, ao que os xogadores chegan con moitas ganas de xogar e poder comprobar os seus progresos conseguidos nestes meses de tempada.
Ver esta publicación en Instagram
A continuación (17:00 h) xogarán os equipos “B” de CW Santiago e CW Pontevedra nun duelo de filiais na liga Galega Absoluta Masculina de 2ª División. Os pontevedreses xogarán o seu terceiro partido da tempada, en busca dunha primeira vitoria, pero co obxectivo de sumar experiencia competitiva para o futuro. Enfronte, o CW Santiago pretenderá que o conxunto visitante non consiga sumar.
Para pechar a xornada (18:30 h), disputarase un dos clásicos galegos dos últimos anos, partido de División de Honra Masculina entre santiagueses e pontevedreses, con ambos os equipos sempre loitando polo obxectivo do título ligueiro. Os pontevedreses, con só tres xornadas disputadas ata a data e un equipo moi novo, saltarán como sempre á auga con intención de pelexar polos tres puntos fronte ao actual líder da clasificación, igual que os santiagueses.
