A Liga Guerreras está que arde para as galegas. Por unha parte, o Mecalia Atlético Guardés terá unha proba de fogo antes da Challenge Cup co seu rival. Enfróntanse ao Aula Alimentos Valladolid na xornada 14 antes da gran cita para ambos equipos. Pola outra banda está o Conservas Orbe Porriño. As porriñense teñen un encontro moi vital ante o Balonmano Salud Tenerife.
O primeiro asalto antes da Challenge dispútase na Sangriña
Dous equipos é un único destino. O Mecalia Atlético Guardés e o Aula Alimentos Valladolid, rivais na Challenge Cup, enfróntase este sábado por cuarta vez —tres na pretemporada e un na Liga— na Sangriña. Pero non ten por que quedar ahí xa que ambos poden reencontrarse na Copa da Raíña.
De momento, no conxunto, só se pensa no día a día: “Retormamos a Liga despois da Copa, a competición xa é diferente, e aínda vamos a xogar contra o Aula tres partidos, primeiro hai que pensar na Liga e despois xa chegará a eliminatorio á 120 minutos“, comenta o adestrador do Guardés, José I. Prades.
Deixando ao carón a clasificación para a fase final da Copa da Raíña ante o Salud Tenerife, o Guardés vén de encadear en liga dous empates contra Bera Bera e Elche e unha derrota na súa visita ao KH-7 Bm. Granollers.
“As sensacións nos últimos partidos foron boas”, celebra o técnico do Guardés, á vez que lamenta que este estado “non se traduciu en puntos”. “Se queremos manter a posición de privilexio que temos, hai que sumar”, lembra nas horas previas a visita do Aula Alimentos de Valladolid.
Consumida xa media competición, os resultados fanse cada vez máis decisivos e, aínda que o Guardés non mira ao resto de equipos, é consciente da importancia de cada partido. Prades xa adianta que “vai ser igual de complicado que o últimos partidos en casa” e lembra a derrota na terceira xornada en Valladolid.
No relativo á clasificación hai que apuntar que nas últimas semanas o Guardés distanciouse do líder, Bera Bera, e agora, con 17 puntos, ocupa a cuarta posición. A seis, con 11, atópase o Aula Alimentos de Valladolid que descansa na oitava praza cun balance de cinco vitorias, un empate e sete derrotas. Nos enfrontamentos directos desta tempada a sorte sorrí ás de Miguel Ángel Penas cunha vitoria pola mínima (27:26) na terceira xornada ligueira.
DATOS DE INTERESE
DÍA E HORA: 22 de febreiro, ás 18.00 horas.
CAMPO: Pavillón da Sangriña – A Guardia.
ÁRBITROS: Raúl Oyarzun e Aritz Zaragueta.
INCIDENCIAS: Partido correspondente a xornada 14 da Liga Guerreras Iberdrola de balonmán no que enfrontará ao Mecalia Atlético Guardés co Aula Alimentos de Valladolid no pavillón da Sangriña.
Partido vital para o Conservas Orbe Porriño
O lume non arderá soamente na Sangriña. No pavillón municipal do Porriño acolle unha cita moi igualada para o seu equipo. O Conserva Orbe Porriño enfrontarase ao Balonmano Salud Tenerife o sábado 22, ás 19.30 horas.
“Vai a marcar moito o devenir do equipo, sácalo sería moi importante para nos porque senón nos meteremos en postos de descenso que sería a segunda xornada que estaríamos en eses chanzos dos que queremos fuxir” comentaba o adestrador do Porriño, Isma Martínez, para As Nosas.
Encontro de igualdade. Ambos equipos atópanse na Liga Guerreras nunhas condicions moi similares e bastante complicadas. Polo que será moi importante sumar os dous puntos. O Balonmano Tenerife non está moi lonxe das porriñenses. Son undécimas e xusto encima está o Conserva Orbe. A única diferenza entre local e rival é que as de Porriño suman un punto máis co conxunto canario.
“Son un rival moi forte porque é un recen ascendido que fixo un gran esforzo económico para poder estar aquí. Teñen boas xogadoras e ademais fixeron bos fichajes para esta tempada” engadiu Isma Martínez.
Os dous rivais chegan a cita nunha situación parecida. Na xornada anterior, as porriñenses perderon ante o BMC Liberbank Gijón por un 30 a 23. Ademais da derrota na volta da segunda fase na Copa da Raíña con este mesmo equipo. Pola contra o Tenerife rabuñou o fin de semana anterior un punto tras empatar ante o Rocasa Gran Canaria (25 a 25).
DATOS DE INTERESE
DÍA E HORA: 22 de febreiro, ás 19.30 horas.
CAMPO: Pavillón Municipal do Porriño.
ÁRBITROS: Lorena García Gil e Tania Rodríguez Estévez.
INCIDENCIAS: Partido correspondente a xornada 14 da Liga Guerreras Iberdrola de balonmán no que enfrontará ao Conservas Orbe Porriño co Balonmano Salud Tenerife no pavillón municipal de Porriño.
