A localidade portuguesa de Aveiro como escenario, e o Esgueira Basket como rival, agardan ao Celta Zorka Recalvi no seu primeiro amigable da pretempada.
Ver esta publicación en Instagram
O conxunto celeste xa está en terras lusas para medirse, hoxe sábado 2 de setembro a partir das 18:30 (hora portuguesa) na cancha do Caldeirão, ás xogadoras que adestra a dupla conformada por André Janicas e Francisco Morais. Á fronte do banco do conxunto vigués do Celta Zorka Recalvi mantense un curso máis Cristina Cantero.
Na previa ao primero partido amigable da pretempada a adestradora Cristina Cantero falou sobre a preparación do equipo, as expectativas no retorno á Liga Femenina Endesa. Un ascenso gañado a pulso que devolve ás galegas á elite estatal.
A adestradora das celestes explicaba que se está a traballar ben na pretempada. Comentaba que se está a “xerar grupo, unhas bases de traballo e un tipo de xogo que teñan claro”. Admitía que no primeiro choque en Aveiro, non vai ser “super esixente a nivel táctico, é algo que irá chegando pouco a pouco. O que non fagamos no primeiro partido irá aparecendo no resto de partidos. Buscamos darlle un estado físico óptimo ao equipo”, matizaba a preparadora das viguesas.
Cristina Cantero quere un “equipo competitivo que non dea un balón por partido que saiba sufrir que se agarre á pista”.
Advertía con ilusión de cara á vindeira tempada na Liga Femenina Endesa: “Imos gozar de algo que levamos tempo desexando, xogar a mellor liga estatal”.
Para facelo, a adestradora do Celta Zorka Recalvi conta cos seareiros. “Esperamos que a afección nos empuxe cada momento de debilidade que teñamos. Imos precisar que Navia sexa un fortín. Que entre todos gozemos dunha tempada ilusionante”, apuntaba a técnica nunha entrevista publicada nas redes sociais do club.
Ver esta publicación en Instagram
Esta semana o Celta Zorka Recalvi facía públicos os dorsais que terán nas costas cada unha das xogadoras que integran o bloque do club vigués este curso.
