No ámbito deportivo de Vigo, a prevención e as probas diagnósticas están a ser as ferramentas chave na xestión da pandemia de COVID-19. Así o recoñece o secretario xeral para o Deporte, José Ramón Lete Lasa, nunha charla informativa que se celebrou na Casa do Deporte viguesa.
No acto, organizado en colaboración coa UFEDEGA, o mandatario apuntou que “a colaboración coas entidades deportivas fixo posible a aprobación do protocolo FISICOVID-DXTGALEGO no que se estableceu a metodoloxía para seguir polas federacións deportivas para dotarse de medidas de prevención necesarias e específicas, e de obrigada observancia para o conxunto dos estamentos federativos”.
Deste xeito, Galicia veuse dende moi cedo protexida polos protocolos federativos, das instalacións deportivas como o CGTD, así como as Guías DXT Galego ‘Volvendo con sentidiño’, as ‘Pílulas Solidarias’ coa Sociedade Iberoamericana de Psicoloxía do Deporte, a plataforma ‘Adestra na Casa’ ou Foro de Reactivación do Deporte. A Secretaría Xeral para o Deporte contribuiu ademais a minimizar os efectos da pandemia aumentando o orzamento xeral en 2021 do 28,5%.
Os beneficios do deporte nas nenas e nenos
José Ramón Lete Lasa apuntou á importancia da actividade física na saúde da poboación como demostran os resultados preliminares do estudo da incidencia de SARS-COV-2 na poboación infantil e xuvenil (≤18 anos) que practica deporte federado, levado a cabo polo Sergas en colaboración co Instituto de Investigación Biomédica de A Coruña.
Neste sentido apuntou que, a actividade física frecuente mellora substancialmente a forma física e o estado de saúde de nenas e novas. En comparación coas nenas e mozas inactivas, as que fan exercicio presentan un mellor estado cardiorrespiratorio e maior resistencia muscular, e unha mellora da súa saúde, menor graxa corporal, un perfil de risco de enfermidade cardiovascular e metabólica máis favorable, unha mellor saúde ósea, e unha menor presenza de síntomas de ansiedade e depresión.
Os responsables médicos de Vigo destacan o control sanitario
Á charla informativa tamén acudiron o xerente da Área Sanitaria de Vigo, Javier Puente, o xefe do servizo de Microbioloxía da Área Sanitaria de Vigo, Benito Regueiro e a especialista en Medicina Preventiva da Área Sanitaria de Vigo, María Herranz.
No caso dos responsables médicos, sinalaron o índice de trazabilidade do 81% da comunidade galega e a capacidade da área sanitaria de Vigo para realizar 15.000 probas diagnósticas ao día. O control levado a cabo polo eido sanitario e a prevención e seguridade esixidas polo tecido deportivo galego comparecen como como ferramentas chave no éxito da xestión da pandemia na área sanitaria de Vigo.
