- Dez equipos competirán na competición feminina da Liga Galega de Traiñeiras nesta tempada.
- A Asociación Liga Noroeste organiza un ano máis a competición por excelencia do banco fixo en Galicia nas súas tres categorías: Liga A, Liga B e Liga feminina.
- O alcalde da Pobra do Caramiñal, José Carlos Vidal, manifestou a fachenda do Concello por contar con entidades como o Club de Remo Puebla e acoller competicións destas características.
A Pobra acolleu, está mañá, a presentación oficial da Liga Galega de Traiñeiras. O acto realizouse na praia da Lombiña, contando coa intervención do alcalde, José Carlos Vidal, do conselleiro de Presidencia, Xustiza e Deportes, Diego Calvo, e do presidente Asociación Liga Noroeste, Francisco Javier Rodríguez Barros. Á cita asistiu, así mesmo, o concelleiro de Deportes da Pobra, Eloy Sobrido, e representantes dos distintos clubs que participarán na competición. Tal e como se indicou durante a presentación, na Liga tomarán parte preto dunha trintena de equipos, enfrontándose ás distintas probas entre o sábado, 28 de xuño, e finais de agosto.
🛶 Apoiamos a Liga Galega de Traiñeiras con case unha trintena de equipos nas súas tres categorías
📅 @DiegoCalvoPouso participou no acto de presentación da competición na Pobra do Caramiñal que arrincará o 28 de xuño e se prolongará ata finais de agostohttps://t.co/SGbbe0qAa6 pic.twitter.com/S6rI2ocHNA
— Presidencia, Xustiza e Deportes (@ConsPresidencia) June 21, 2025
Durante a súa intervención, o rexedor sinalou o “orgullo” que supón para A Pobra repetir como escenario dunha proba destas características. Así, tal e como Vidal apuntou, o municipio acolleu, nos últimos meses, a I Bandeira Deputación da Coruña e o 78º Campionato de España de Traiñeiriñas. Como subliñou, “son citas que falan da nosa tradición remeira e, sobre todo, do bo facer dos nosos deportistas”. Neste punto, o primeiro edil referiuse ao Club Remo Puebla, ao que definiu como “unha auténtica institución na Pobra e un motivo de orgullo para todos os veciños e veciñas”.
A presentación desta Liga Galega de Traiñeiras celebrouse na Pobra do Caramiñal, onde ten sede o Club Remo Puebla, afectada por un incendio o pasado xaneiro. Diego Calvo puxo en valor “a resiliencia, superación e esforzo” do club por superar esta situación e poder organizar o mes pasado o Campionato de España de Traineirillas.
Desde a Xunta de Galicia saiientan que se concedeu unha axuda extraordinaria de 60.000 euros tras o incendio para adquirir material seguir co fomento da práctica do deporte do remo, así como a súa participación nas diferentes competicións. Ademais, o Goberno galego autorizou o uso da nova sede do club no porto da Pobra do Caramiñal cunha bonificación do 90% das taxas.
Este club, fundado en 1979, é un dos importantes de Galicia, nomeadamente, no banco fixo, e na tempada 2021 competiu con tres embarcacións en todas as categorías da Liga Galega de Traiñeiras: A, B e feminina. O Club Remo Puebla conta con preto de 150 licenzas federativas, sendo o 61% das mesmas de base.
Calendario da Liga Galega de Traiñeiras
A Liga Galega de Traiñeiras dará comezo o sábado, 28 de xuño, coa XI Bandeira Concello de Redondela da Liga A, a III Bandeira Chapela-Wofco da Liga B e a X Bandeira Feminina Concello de Redondela.
No caso do municipio pobrense, a cita fixada no calendario da Liga terá lugar o sábado, 12 de xullo, coa XX Bandeira Concello da Pobra. A competición conta cunha Liga A e cunha B, na que competirá o Club Remo Puebla. En total, serán 16 os conxuntos que tomarán parte na competición. No apartado feminino serán 10 os equipos participantes.
A Liga A desta Liga Galega de Traiñeiras está conformada por 11 equipos:
- CR Narón
- CR Cabo da Cruz
- CM Castropol
- CCD Cesantes-Rodavigo
- Chapela-Wofco
- CR Mecos
- CR Urme
- Samertolameu-Oversea
- Tirán-Pereira
- Bueu
- Mugardos
Cómpre salientar os 10 equipos femininos que competirán na LGT. Serán as seguintes embarcacións:
- Amegrove
- Cabo de Cruz
- Salgado-Perillo
- Tirán-Pereira
- Rianxo
- Castropol
- Cesantes-Bueu-Cefycal-Simei
- Mecos
- A Cabana de Ferrol
- E a defensora do título Chapela-Wofco
A tripulación da traineira Chapela Wofco, campioa da Liga Feminina 2023 / LIGA LGT
A Liga B masculina contará con cinco traiñeiras:
- CR Salgado-Perillo
- CR A Cabana-Ferrol
- CR Puebla
- CR Chapela-Wofco B
- CM Bueu-Simei B.
Diego Calvo salienta a tradición das traiñeiras en Galicia
Na súa intervención, o conselleiro de Presidencia, Diego Calvo, destacou que as traiñeiras é “un dos deportes con maior tradición e vínculo coa historia de Galicia”, xa que empregábanse para a pesca e “hoxe seguimos desfrutando da súa presenza a través das competicións”.
Por iso, a Xunta recoñece a “singularidade” deste deporte e destina este ano 143.000 euros en apoio á Liga Galega de Traiñeiras.
