Un enclave máxico como a Illa de San Simón, no concello de Redondela, serviu de escenario este sábado para dar a coñecer os detalles da nova temporada da Liga Galega de Traiñeiras – Trofeo Xunta de Galicia. A competición organizada pola Asociación Liga Noroeste volve ofrecer tres categorías e, en total, participarán 25 embarcacións. O calendario de regatas ponse en marcha o vindeiro domingo, día 30, e completarase o 25 de agosto.
A presentación na ría de Vigo contou coa presenza de Diego Calvo, conselleiro de Presidencia, Xustiza e Deportes da Xunta de Galicia; de José Ramón Lete Lasa, secretario xeral de Deportes da Xunta de Galicia; de Javier Rodríguez, presidente da Liga Galega de Traiñeiras; de Digna Rivas, alcaldesa de Redondelas; de varios alcaldes das localidades que acollerán regatas; e de representantes dos club participantes.
A Liga A, a máxima categoría masculina da Liga Galega de Traiñeiras, ten como novidades no seu elenco de doce traiñeiras a Samertolameu, procedente da Liga Eusko Label, e a dous equipos que a pasada campaña ascenderon dende a Liga B: URME, o conxunto xurdido da fusión de Muros e Esteirana, e Mugardos – A Cabana. A defensora do título é Ares.
Chapela-Wofco defenderá o seu título feminino
En canto á Liga Feminina da Liga Galega de Traiñeiras a coroa obtívoa o ano pasado Chapela-Wofco, que volverá ser a rival a bater. A tripulación redondelán compartirá competición con outras seis embarcacións entre as que se atopa a filial de Cabo da Cruz, unha traiñeira que vivirá a súa temporada de estrea.
Tamén se mantén o número de conxuntos, seis, na Liga B masculina. Puebla buscará recuperar a categoría que perdeu a pasada campaña. Pola súa banda, Cedeira regresa despois de non competir no 2023 e a filial de Bueu-Simei aparece como única debutante.
A Liga A será a primeira en activarse dentro desta Liga Galega de Traiñeiras, farao o domingo 30 de xuño en Narón. As outras dúas competicións uniránselle o sábado 6 de xullo. Durante todas as fins de semana ata a penúltima de agosto haberá sempre regatas. O colofón chegará co Trofeo Teresa Herrera, entregándose na Coruña os premios finais da temporada.
A CRTVG transmitirá a Liga Galega de Traiñeiras
A Liga Galega de Traiñeiras – Trofeo Xunta de Galicia poderá seguirse a través da Televisión de Galicia coa retransmisión de varias xornadas e programas resumo. Ademais, este ano a organización instalará unha pantalla nos portos onde se celebran esas regatas televisadas para que o público poida desfrutar das imaxes nos peiraos. A oferta audiovisual desta competición inclúe un programa dixital.
A organización e os responsables dos equipos aproveitaron o acto de presentación para agradecer o apoio das firmas privadas implicadas neste proxecto. Eses patrocinios corresponden a Toldos Gómez, Salgado Congelados, Be Energy y Cobre San Rafael.
