O DOGA publicaba a Orde de 26/7/22 pola que se establecen as bases reguladoras para a concesión de prazas, en réxime de concorrencia competitiva, de tecnificación e rendemento deportivo para o CGTD Centro Galego de Tecnificación Deportiva para a tempada 2022/23. Segundo o anuncio previo, o prazo remata o martes 16 de agosto de 2022. Todos/as os/as atletas que fosen finalmente admitidos/as deberán seguir vinculados ao longo de dous anos co club de orixe, salvo acordo mutuo entre o atleta e o club, segundo informa a FGA.
Entre os requisitos para ser persoa beneficiaria das bolsas figura que poderán ser beneficiarios das prazas para deportistas no Centro Galego de Tecnificación Deportiva todas aquelas persoas deportistas que no momento de facer a solicitude cumpran os requisitos que se detallan a continuación (segundo se recolle na circular:
- Ter nacionalidade española.
- Estar en posesión da licenza deportiva, na modalidade para a que se presenta a solicitude, emitida pola FGA.
- Para os grupos de tecnificación, deberase pertencer a un club deportivo galego ou sociedade anónima deportiva dada de alta no Rexistro de Entidades Deportivas de Galicia, así como estar empadroado nun municipio da Comunidade Autónoma de Galicia.
- As persoas deportistas solicitantes de praza de tecnificación deberán ter promocionado de curso na convocatoria ordinaria de xuño 2022 (non se considera a promoción por imperativo legal).
- Excepcionalmente poderase considerar a posibilidade de repetición daqueles deportistas cuxas federacións xustifiquen que participaron, con posibilidade de seguir participando, en Campionatos de Europa, do mundo ou xogos olímpicos.
No caso do atletismo, explica a Federación Galega que “como todos os anos, ábrese o prazo de solicitudes para cursar estudos no Centro Galego de Tecnificación Deportiva de Pontevedra na que as prazas ofertadas serán para o sector de lanzamentos”.
Todas/os aqueles atletas interesados en optar a unha praza/bolsa deberán encher a solicitude ata o día 16 de agosto.
A FGA remitirá unha proposta á dirección do CGTD
A Federación Galega de Atletismo, unha vez recibidas todas as solicitudes emitirá unha proposta á Dirección do Centro Galego de Tecnificación Deportiva (CGTD).
- LIGAZÓN Á SOLICITUDE
- Máis infomación, nesta Circular 82-2022
