Pleno de medallas para o Club Volei Praia Milenio no torneo de inverno celebrado en Mallorca. Na categoría feminina, Nuria Bouza acadou o ouro enfrontándose na final a súa compañeira de club, Tea Ándric, que quedou en segunda posición. Na competición masculina, David Guiñazú tamén logrou proclamarse campión con Finn Pickert.
A final feminina deste torneo, onde o factor multiplicador de puntos era por dous, celebrouse a pasada fin de semana. Na area de Mallorca encontráronse dúas compañeiras de club: Nuria Bouza e Tea Ándric, aínda que desta vez cada unha a un lado da rede.
Ándric formou parella coa xogadora do Volei Praia Vigo, Eymi Plaza; mentres que Bouza xuntouse para esta competición con Kadri Puri. Finalmente, o ouro foi para o tándem Bouza/Puri, que se fixo co partido cun 2-0 fronte a Ándric/Plaza.
Desta forma, o Volei Praia Milenio segue colleitando éxitos na liga de inverno, cun ouro e unha prata. En categoría masculina tamén acadou o máximo galardón, con David Guiñazú e Finn Pickert, tamén do Volei Praia Vigo, ante a retirada da parella Ripoll/López por cambras.
As seguintes probas disputaranse en Canarias e en Zaragoza na fin de semana do 12 e 13 de decembro, onde o club ourensán Praia Mileniotamén terá representación.
