José Ignacio Prades xa está de volta. O seu clube, o Mecalia Atlético Guardés, fixo público esta mañá que o técnico preterí foi dado de alta médica esta semana logo de recuperarse sen incidencias da interveción á que foi sometido o pasado 10 de febreiro para solventar unha leve doenza renal.
Case un mes despois, o adestrador do conxunto miñoto regresou á actividade presencial sobre a pista, e onte mesmo xa dirixiu o adestramento con total normalidade e o sábado sentará no banco visitante do Palau D’ Esports de Granollers para dirixir ao Guardés no seu compromiso da décimo sétima xornada ligueira fronte ao equipo catalán.
🥳 Adiviñade quen está de volta?
👋 Xa está aquí o Xefe.
👍 José Ignacio Prades xa ten a alta médica e este sábado dirixirá ó equipo en Granollers.
🤗 Benvido!📷 @Coex_go pic.twitter.com/AlvDQun1Xh
— Mecalia Atlético Guardés (@Atlguardes_ofic) March 9, 2022
Abel González supliu a Prades con pleno de vitorias
Deste xeito, José Ignacio Prades pon punto e final a unha ausencia que rozou o mes de duración aínda que se traduciu en soamente dous partidos. O adiamento do derbi galego fronte ao Conservas Orbe Rubensa Porriño por mor dos seis casos positivos no Guardés, así como o parón de seleccións da derradeira fin de semana, fixeron que o preparador de Petrer só estivera ausente nos choques ante o Aula Valladolid e o BM Elxe.
En ámbolos dous encontros, desputados na Sangriña, Abel González asumiu o rol de primeiro adestrador cun éxito rotundo, xa que o cadro local obtivo os catro puntos en xogo, vencendo por 30-26 ás pucelanas e por 25-21 ao conxunto ilicitano.
O Guardés recupera ao seu adestrador para o desenlace ligueiro
Deste xeito, o Mecalia Atlético Guardés recupera ao seu técnico para o tramo final da tempada 2021-22, na que loitará un ano máis por rematar nos postos que dan acceso a xogar competición europea a vindeira tempada.
Polo de agora, o cadro do Baixo Miño avanza na cuarta posición, cun partido menos e con pleno de triunfos como local no que vai de 2022. Polo recinto guardés pasaron algúns rivais directos como os previamente mencionados e aínda teñen que facelo outros galos da categoría como Xixón, Rocasa Gran Canaria ou Málaga.
