O Atlético Guardés seguirá na próxima tempada con José Ignacio Prades aos mandos do primeiro equipo. O club, que actualmente loita polo título de campión de Liga e un posto na competición europea, aposta por sexto ano consecutivo polo seu técnico.
No curso 2021/2022, o obxectivo das guardesas é “facer un equipo o máis competitivo posible con todas as restriccións que imos tendo”, explica o adestrador. Prades móstrase feliz por poder seguir dirixindo ao Atlético Guardés unha tempada máis: “Estou moi contento e moi feliz de estar nun sitio onde sempre sentes o cariño da xente e o feedback do club, que sempre foi positivo co noso traballo”.
José I. Prades: “Estou moi contento e moi feliz de estar nun sitio onde sempre sentes o cariño da xente e o feedback do club, que sempre foi positivo co noso traballo”
O adestrador asegura que, malia as dificultades, ten unhas condicións deportivas “a nivel de traballo, de adestramento”, que lle permiten “ter un grupo á túa maneira”, loitando sempre polos primeiros postos.
A meta do Guardés é seguir arriba
Antes de pensar no obxectivo para a tempada 2021/2022, Prades recorda que primeiro hai que acadar o marcado para o presente curso. “Imos ver se conseguimos este ano o obxectivo de entrar en competición europea, que sería unha boa maneira de rematar a fase polo título. E a ver que pasa coa Copa da Raíña“.
Mirando xa á seguinte, o adestrador asegura que a motivación principal é a mesma que nos últimos anos, confeccionar un plantel competitivo. Algo que co paso do tempo resulta cada vez máis complicado, “porque todos se reforzan, todos aumentan orzamento e ao final cada vez hai máis equipos que pelexan polos postos de arriba”.
José I. Prades: “Todos se reforzan, todos aumentan orzamento e ao final cada vez hai máis equipos que pelexan polos postos de arriba”
Outro hándicap para o Atlético Guardés é a súa localización, xa que “ao final onde estamos é un sitio con difícil acceso para a xente que queira estudar e tampouco somos os que máis pagamos da categoría”.
Isto non freou con anterioridade ás galegas. “Sempre conseguimos formar un equipo que pelexa”, afirma Prades. A isto engade que “non poñemos obxectivos moi a curto prazo e tampouco inalcanzables. Só competir da mellor maneira posible e estar arriba competindo cos mellores”.
O equipo de Prades precisa reforzar a banda dereita
Para formar un grupo competitivo, o Atlético Guardés deberá sobreponerse á marcha de Buforn, Valero e Urban, reforzando a súa banda dereita.
“Loxicamente, coa marcha das que xa se coñecen, Paulina, Rosario e Valero, na zona da dereita, con lateral, extremo e pivote, imos necesitar reforzos seguro”, sinala Prades.
Con todo, o club galego xa ten moi avanzado o plantel da tempada 2021/2022, coas xogadoras pechadas case ao 90%. Coa competición aínda en curso, haberá que agardar á finalización da mesma para coñecer os nomes das renovacións e fichaxes do Atlético Guardés.
