O Mecalia Atlético Guardés, dirixido polo técnico José Ignacio Prades, despídese da tempada 2019-2020. Un curso atípico marcado pola irrupción a nivel mundial da pandemia do coronavirus e que por cuestións sanitarias deuse por finalizado a falta de seis xornadas e cunha fase final da Copa da Raíña no aire.
Así, nun contexto pouco habitual, o club do Baixo Miño logra unha terceira posición na Liga Guerreiras Iberdrola e a clasificación para a EHF European Cup como cuarto -ao outorgar a RFEBM as prazas continentais en base aos resultados da primeira volta-. Entre poucas certezas e moitos interrogantes fai balance o técnico do Guardés, José Ignacio Prades, que a próxima tempada cumprirá un lustro na entidade.
Pregunta: A tempada 2019-2020 xa está finalizada oficialmente. Terceiras na Liga Guerreiras Iberdrola, de volta na fase final da Copa da Raíña e facendo camiño na Challenge Cup ata os cuartos de final. Como se valora e que sensacións deixa un curso que se despide raro?
Resposta: A tempada deixa un sabor agridoce pola maneira de finalizar. Non se puido acabar na pista, pero tanto o traballo como as sensacións nos últimos meses foron boas. O grupo ía crecendo conforme avanzaban as xornadas e as esperanzas de subir un banzo na liga estaban aí. Os dous primeiros non conseguiran gañarnos e aínda que o título era complicado xa que o Bera Bera estáballo gañado con suor…por que non pelexar pola segunda praza?
Tamén tiñamos moitas esperanzas na Copa da Raíña, unha competición coa que aínda non sabemos que pasará. Sempre nos quedará a espiña da competición europea. Tivemos as nosas opcións, pero sempre houbo unha resposta de Aula, a presión púidonos un pouquiño e as oportunidades que tivemos para canalizar o partido non as aproveitamos. A ida pesounos demasiado. Aínda así, a traxectoria creo que é para estar satisfeitos.
José Ignacio Prades, adestrador do Atlético Guardés: “A tempada deixa un sabor agridoce pola maneira de finalizar. Non se puido acabar na pista, pero tanto o traballo como as sensacións nos últimos meses foron boas”.
P: Para a próxima tempada haberá cambios na composición da Liga, non se sabe se a Copa Reina 19-20 poderase organizar finalmente e tamén se vivirá unha competición europea reestruturada, ao xogar na EHF European Cup. Como se planifica un tempada con tantos interrogantes no aire?
R: Temos que tentar anticiparnos ao que poderá ser a próxima tempada. Sobre todo en cousas xerais e que non nos imos a equivocar. Ata que non pase a Asemblea da Federación Española (13 de xuño, Madrid) non saberemos datas, aínda que se espera que entre finais de agosto e principios de setembro empece a competición.
Hai Europeo en decembro e Preolímpico en marzo, polo que o calendario terá que adaptarse a estas competicións. Coa competición europea volveremos vivir a situación de partidos mércores e sábado ou domingo e iso non será novo para nós. No que pensamos agora mesmo é en axustar ao equipo, buscar variantes, novidades, planificando sempre pero con esa dose de incerteza.
José Ignacio Prades, adestrador do Atlético Guardés: “Coa competición europea volveremos vivir a situación de partidos mércores e sábado ou domingo e iso non será novo para nós. No que pensamos agora mesmo é en axustar ao equipo”.
P: A día de hoxe, e cos tempos que se manexan, cando cre que os equipos de División de Honra poderán reincorporarse ao traballo?
R: Todo cambia dun día para outro. Gustaríame poder afirmar que a finais de xullo empezaremos a tempada, é o que nos gustaría a todos, pero de momento non me atrevo a dicir iso. As xogadoras van estar case cinco meses paradas e iso vai provocar que cambiemos cousas na preparación, tanto na previa como na pista. Teremos que reinventar o traballo.
José Ignacio Prades, adestrador do Atlético Guardés: “Gustaríame poder afirmar que a finais de xullo empezaremos a tempada, é o que nos gustaría a todos, pero de momento non me atrevo a dicir iso”.
P: Por adiantar máis pinceladas do proxecto 20-21. De momento catro integrantes: José Ignacio Prades como técnico e as tres capitás África Sempere, Marisol Carratú e Lorena Pérez. Espérase reter ao groso do bloque?
R: Esperamos poucos cambios. Estamos moi tranquilos nese sentido, practicamente está o bloque renovado. Contamos cunhas tres baixas e un número de altas similar que esperamos anunciar nas próximas datas. O obxectivo será de novo conformar un plantel para competir con todos como nos anos precedentes, sabendo que non somos o equipo que ofrece mellores condicións económicas. Ao Guardés as xogadoras veñen polo traballo, por como se vive o balonmán, o aliciente da competición europea…
José Ignacio Prades, adestrador do Atlético Guardés: “Esperamos poucos cambios. Estamos moi tranquilos nese sentido, practicamente está o bloque renovado. Contamos cunhas tres baixas e un número de altas similar que esperamos anunciar nas próximas datas”.
