- A central, ex do BM Porriño, foi medalla de prata no Mundial de Xapón no 2019.
- A lateral do conxunto miñoto afiánzase nas convocatoria de Prades tras a súa participación nos pasados Xogos Olímpicos de Tokio.
O seleccionador nacional, José Ignacio Prades, fixo público o listado das 18 xogadoras que formarán o bloque de España a partir do vindeiro mes no Campionato do Mundo que por vez primeira se disputará en territorio nacional.
Alicia Fernández e Paula Arcos serán as representantes do noso balonmán a partir do 1 de decembro en Torrevieja. A valdoviñesa, unha fixa en tódalas convocatorias, buscará redimirse da polémica derrota sufrida na final da pasada cita mundialista celebrada fai dous anos no país do Sol Nacente fronte á selección dos Países Baixos por un axustado 30-29.
Pola súa parte, Arcos repite coma internacional nunha gran cita tras a súa convocatoria para os Xogos Olímpicos de Tokio o pasado verán. A lateral do Guardés segue a xustificar a confianza do seu adestrador, e seleccionador, grazas ao seu bo facer no conxunto miñoto.
Previamente ao comezo do Campionato do Mundo, as xogadoras dirixidas por José Ignacio Prades participarán no Torneo Internacional de España, organizado pola RFEBM entre os días 26 e 28 de novembro no Pavillón Rey Felipe VI de Boadilla del Monte en Madrid, onde as Guerreras se enfrontarán a Alemaña, Polonia e Eslovaquia para poñerse a punto de cara á gran cita.
A convocatoria completa de Prades para o Campionato do Mundo 2021:
- Portería | Silvia Navarro (Rocasa Gran Canaria) e Mercedes Castellanos (Costa del Sol Málaga)
- Central | Silvia Arderius (Costa del Sol Málaga), Alicia Fernández (Rapid Bucuresti)
- Lateral Esquerdo | Carmen Campos (JDA Dijon), Laura Hernández (Super Amara Bera Bera), Lara González (Paris 92), Alexandrina Barbosa (CSG 2018 Gloria Bistrita)
- Lateral Dereito | Almudena Rodríguez (CSG 2018 Gloria Bistrita), Irene Espínola (Neckarsulmer SU), Paula Arcos (Mecalia Atlético Guardés)
- Extremo Esquerdo | Jennifer Gutiérrez (BVB Dortmund), Sole López (Costa del Sol Málaga)
- Extremo Dereito | Carmen Martín (CSM Bucuresti), Maitane Etxeberria (Super Amara Bera Bera)
- Pivote | Eli Cesáreo (Super Amara Bera Bera), Kaba Gassama (Fleury Loiret), Ainhoa Hernández (Rapid Bucuresti)
A lista mantén o bloque dos últimos enfrontamentos ante Eslovaquia e Portugal coas novidades dos regresos de Ainhoa Hernández, compañeira de Alicia Fernández no Rápid Bucuresti romanés, e da lateral esquerda do Bera Bera, Laura Hernández, e as ausencias de Nerea Pena e Mireya González.
🇪🇸📝 ¡LLEGÓ EL DÍA! ¡Ellas son las 1⃣8⃣ #Guerreras elegidas para afrontar nuestra gran cita, el Campeonato del Mundo de España 2021!⁰
❤️ Todo un país está con vosotras, jugamos en casa y la ilusión es máxima. ¡A por todas EQUIPO!✊⁰#SheLovesHandball #Spain2021 @SheLOVsHandball pic.twitter.com/RtmxvKeuzU— RFEBalonmano (@RFEBalonmano) November 15, 2021
O seleccionador estatal, José Ignacio Prades, fai balance da convocatoria facendo fincapé no equilibrio da mesma:
Buscamos unha convocatoria equilibrada en tódolos ámbitos, polo que foi difícil de elaborar. Son as 18 xogadoras máis equilibradas posibles, hoxe en día é a mellor lista.
José Ignacio Prades
A ilusión por bandeira
Tras o cruel desenlace do pasado mundial, e a decepcionante actuación nas olimpíadas e no Campionato Europeo de Francia, o combinado nacional afrontará esta cita como unha oportunidade de volver a demostrar todo o seu potencial e loitar por cumplir unha xesta inédita no balonmán feminino español.
O Torneo Internacional de España valerá para por a proba a preparación da do conxunto dirixido por José Ignacio Prades antes do partido inaugural do campionato fronte á Arxentina o vindeiro 1 de decembro ás 20:30 horas.
A escadra vermella non estará soa ao longo desta dura empresa xa que a súa condición de anfitrioa suporalle contar co inesgotable alento das súas seareiras para que o ouro quede na casa por primeira vez na historia.
