O Atlético Guardés comeza o seu maratón de semanas con citas dobres. “Estamos preparadas para este período competitivo tan esixente, con moitas ganas e ilusión de afrontar a competición e seguir paso a paso”, apunta o adestrador, José I. Prades.
No próximo mes, as galegas poderán acumular moitos éxitos ou acusar o cansancio de xogar sen descanso. Pero as galegas están preparadas e o primeiro reto será ante o Balonmano Zuazo, este mércores, 10 de febreiro, ás 20:00 horas en A Sangriña.
A “dinámica diferente”, en palabras do técnico, será un desafío maiúsculo, pero que non amedrenta ás xogadoras do Atlético Guardés. “Adestramos moito e ben”, insiste Prades.
O Guardés non se relaxa ante o Zuazo
Para este encontro, enfronte terán ao Zuazo, o quinto clasificado e coa metade de puntos que as guardesas. Porén, esta inferioridade na táboa non debe facer que o Guardés se relaxe. “Non podes confiarte ante ningún equipo e co Zuazo moito menos. Temos moi recente o partido de Bera Bera onde semellaba que viñan con moitas baixas e superáronnos en todo”, advirte o adestrador.
Unha derrota da que se recuperaron anímica e deportivamente á semana seguinte, vencendo ao Uneatlántico Pereda.
José I. Prades: “Non podes confiarte ante ningún equipo e co Zuazo moito menos”
Malia que o rival desta xornada é, aparentemente, de menor nivel, Prades insiste en que “Zuazo sabe moi ben ao que xoga e vainos complicar moito as cousas”.
As vascas tiveron que superar un gromo de COVID-19 (que afectou a nove xogadoras e a un membro do corpo técnico), o que obrigou a aprazar a eliminatoria de Copa que tiñan precisamente contra o Guardés. Por este motivo, o cadro vasco non puido adestrar con normalidade nos últimos días.
Unha vez superado o illamento, ambos equipos encontraranse na undécima xornada da Liga Guerreras Iberdrola. Para este duelo, Prades poderá contar con todas as súas xogadoras, aínda que Rosario é dúbida debido ao golpe que recibiu no anterior partido.
O partido poderá seguirse vía streaming no Youtube do Atlético Guardés.
O ritmo non para
Esta undécima xornada tivo que adiantarse xa que esta fin de semana as galegas enfróntanse ao ucraíno HC Galychanka Lviv. O partido enmárcase na ida dos cuartos de final da EHF European Cup.
Prades: “É unha cuestión de velo como unha oportunidade de competir e xogar, que é o que máis nos gusta e onde máis se desfruta”
A apretada axenda que teñen por diante as guardesas non se ve como algo negativo no club. “É unha cuestión de velo como unha oportunidade de competir e xogar, que é o que máis nos gusta e onde máis se desfruta. Adestramos moito e estamos sempre á espera de que chegue o partido para poñer en práctica todo o traballado”, afirma Prades.
