As Guerreras de balonmán acudiron á cita dos Xogos Olímpicos con triple representación galega. Á ferrolá de Valdoviño Alicia Fernández uniuse Paula Arcos, xogadora do Atlético Guardés, e tamén José I. Prades, adestrador do mesmo equipo e segundo técnico coa Selección Española.
O preparador, que puido vivir a experiencia olímpica desde dentro, encomia a actuación das dúas xogadoras, asegurando que “ambas estiveron a un nivel moi bo e moi alto”.
Alicia Fernández e Paula Arcos nos Xogos Olímpicos, segundo Prades
Sobre a galega, o adestrador afirma que “a min me gustou moito”. Antes da gran cita en Toquio, Alicia Fernández sufriu molestias por problemas físicos, “pero chegou nun bo momento de forma e foi moitas veces unha moi bo compás da dirección do equipo, deu moito dinamismo ao grupo, moveu con moito criterio o traballo e foi unha persoa disciplinada co que se lle pedía”.
Prades: “Póñolle unha nota altísima tanto a Paula como a Alicia polo campionato que fixeron”
Sobre a súa pupila nas filas do Guardés, Prades destaca como “era debutante e semellaba que non o era. Saltou con desenvoltura no partido de Francia. A súa aportación nese partido foi máis defensiva, que ofensiva pero creou perigo en ataque malia xogar nun posto que normalmente non ocupa. En defensa cumpriu, fíxoo moi ben e estivo moi atrevida e foi moi valente”.
En poucas palabras, o técnico afirma que “lle poño unha nota altísima tanto a Paula como a Alicia polo campionato que fixeron”.
Despedida de Toquio con sabor amargo
En liñas xerais, Prades admite que “creo que todos tivemos sensación un tanto amarga por non pasar a cuartos, con esa desazón porque ao final rematas o campionato cunha derrota ante un rival potentísimo como Rusia, que chegou á final olímpica coas francesas, ás que derrotamos na fase de grupos”.
As españolas foron eliminadas malia obter catro puntos na fase previa, na que competiron nun grupo “complicadísimo”, no que era difícil “pasar a corte”.
Prades: “Foi moi complexo competir nese grupo e creo que hai que quedarse con que competimos en moitos partidos e estivemos aí con opcións reais”
“Foi moi complexo competir nese grupo e creo que hai que quedarse con que competimos en moitos partidos e estivemos aí con opcións reais. Foi un empate o que nos deixou fóra. No mesmo grupo cos memos puntos pasaron como terceiros de grupo e nós con 4 quedamos fóra. Incluso con 3 puntos no outro grupo pasaron. Iso fala aínda máis da igualdade que houbo, do complexo que foi o noso grupo”, explica o adestrador.
Segundo Prades, a explicación estivo na falta de regularidade das Guerreras, aínda que “deportivamente o equipo exprimiuse e deu moitas veces todo o que todo o que tiña”.
Histórica vitoria ante Francia
As españolas comezaron a competición cunha derrota ante unha Suecia “que viña avisando de que xogaba moi ben”. Despois deste encontro perdido, as Guerreras precisaban gañar e o seu rival era Francia.
Históricamente, as españolas nunca conseguiran vencer ás galas nun duelo olímpico, así que o reto era maiúsculo, pero as xogadoras responderon. “Necesitábamos un punto de inflexión e unha reacción. O equipo fixo un partido super completo. Na segunda parte non te vou dicir que gañamos con facilidade pero creo que houbo distancia e a supimos administrar e manter. Non foi un partido cómodo pero foi un partido moi traballado e levamos unha vitoria máis que merecida e foi algo que nos animou”, recorda José I. Prades.
Máis adiante, España venceu a Brasil, pero cedeu ante Hungría. O último encontro as enfrontaba a Rusia, no que foi “un partido moi complexo. Rusia foi de menos a máis no campionato e meteuse na final olímpica porque estaba xogando fenomenal e derrotou a Noruega, que era unha das favoritas”. Finalmente, a Selección foi eliminada e non puido acceder a cuartos.
Promoción do deporte feminino galego desde Toquio
Porén, Prades, Fernández e Arcos puideron volver coa maleta cargada de aprendizaxe. O adestrador sinala a importancia de valorar a experiencia e espera que “sirva para que moitos e moitas deportistas se fixen en que o deporte feminino galego ten moito que dicir”.
O adestrador recorda a nomes como Teresa Portela ou Ana Peleteiro para subliñar “como sube o interese na muller deportista galega”, e asegura que os Xogos Olímpicos foron “unha experiencia inesquecible para todo o mundo”.
Prades: “Espero que sirva para alentar a nenas e nenos a facer deporte”
O seu desexo é que “sirva para alentar a nenas e nenos a facer deporte e creo que foi unha moi boa lección, no sentido positivo, para aprender de todo”.
Prades: “Estar entre os 12 equipos que van a unha cita olimpica é un privilexio”
En resumo, Prades apunta a que, malia non lograr a clasificación para cuartos, “o equipo competiu e estivo con posibilidades. Cando pase o tempo darémoslle máis valor acudir a unha cita olimpica. Estar entre os 12 equipos que van a unha cita olimpica é un privilexio e vivilo desde dentro aínda máis”.
