O conxunto galego do Viaxes Amarelle FSF, que adestra o técnico Jorge Basanta, tiña todo planificado para afrontar a sétima xornada da competición nacional este próximo domingo en terras mañas. Pero un positivo en COVID-19 nas filas rivais obriga a adiar o cruce seguindo os protocolos de prevención de contaxios vixentes durante a pandemia.
O Viaxes Amarelle FSF encadrado no Subgrupo D da competición de Primeira RFEF Futsal Feminina debía visitar este domingo 16 de maio ao AD Sala Zaragoza FS, pero o positivo dunha das compoñentes do primeiro equipo do club maño provocou o adiamento da xornada, que resolveu na tarde de onte venres o Xuíz de Competición da RFEF.
As herculinas debían partir na hoxe, sábado 15 de maio, para Zaragoza e medirse nun importante partido fronte ao AD Sala Zaragoza FS, pero a pandemia sanitaria que o noso país está a sufrir volve novamente a aprazar unha xornada de competición para unha escuadra herculina, que xa sufriu dous confinamentos por positivos nas súas filas, e tivo outras xornadas aprazadas por positivos noutras escuadras.
Tras a primeira información por parte do AD Sala Zaragoza FS o mesmo xoves, e a resolución oficial do Xuíz de Competición da RFEF na tarde do venres, o conxunto herculino paralizou a viaxe prevista para este sábado. Agora as súas xogadoras gozarán de varios días de descanso até retomar os adestramentos o vindeiro martes 18 de maio, e preparar o duelo do próximo fin de semana, como locais, recibindo ao líder do Grupo D.
O partido co Sala Zaragoza podería xogarse a última fin de semana de maio
Se todo transcorre con normalidade, e iso esperan desde o conxunto herculino para a saúde das xogadoras do AD Sala Zaragoza FS, este encontro aprazado debería de disputarse o fin de semana do 29 ou 30 de maio, que sería a xornada de recuperación prevista no calendario, previa ás dúas últimas xornadas de competición ligueira.
Tras este adiamento, o seguinte encontro para as galegas será o que terán que afrontar o próximo fin de semana como locais na xornada oitava do Grupo D da Primeira RFEF Futsal Feminina. Será entón cando as futbolistas herculinas que adestra Jorge Basanta recibirán no Pavillón Municipal de Sagrada Familia na Coruña, o sábado 22 de maio de 2021 a partir das 18:00 horas, ao conxunto do Universidade de Alacante FSF.
