Sete ensaios das visitantes por ningún das locais. Podería ser unha simple cifra pero o certo é que reflicte que o Muralla Galicia Emerging que adestran Portos e Sabio non foi quen de poñer sobre o campo das Pedreiras en Lugo todo o rugby que estas mozas galegas levan dentro. A derrota por 0-35 é contundente pero hai competición e vimbios para repoñerse do golpe.
En As Nosas falamos co técnico, Jos Portos, quen se amosaba menos preocupado polo resultado que polo xogo amosado sobre o campo. Pero tamén se lle escoitaba seguro de que as pupilas que adestra xunto con Rogelio Sabio son quen de ofrecer unha imaxe e un xogo moi por encima do que se viu no partido da pasada fin de semana.
As Nosas: Non se empezou co mellor dos resultados…
Jos Portos: Si. Sabemos que a competición vai ser durísima. Temos a perspectiva de nos manter e darlles partidos de alto nivel competitivo a este grupo de rapazas.
As Nosas: Que pasou entón?
Jos Portos: Pois seguramente que algunhas delas se viron superadas polo escenario. Xogar na casa… debut nunha competición nova… Non soubemos facer moito cos pouquiños balóns que tivemos. En defensa sabemos que temos que defender como presas, estar aí encima, e o outro día non fomos quen.
A Nosas: Se somos xustas, o rival tampouco era doado.
Jos Portos: A verdade é que o Industriales é un equipo que ten sido campión de Madrid durante varias anos. É un equipo que ten xogado ao rugby. A súa Liga é moito máis potente que a nosa e os resultados están aí. Non soubemos facer nada co balón e defendemos mal, así que o resultado é o que é.
“A verdade é que o Industriales é un equipo que ten sido campión de Madrid durante varias anos”.
As Nosas: Serve para aprender.
Jos Portos: Temos moitas ganas de mellorar. Xa nos tempos posto o mono de traballo para corrixir erros que temos visto e imos pasiño a pasiño. Sabemos que agora véñennos unha recua de partidos moi difíciles, con equipos moito máis potentes. A ver se podemos sacar algo máis de aí.
O próximo compromiso das de Portos e Sabio, en Cataluña
Así analizaba o adestrador, Jos Portos, o último partido das súas pupilas. A seguinte cita competitiva do Muralla Galicia Emerging, equipo que adestra formando tandem con Rogelio Sabio, será o vindeiro sábado 25 de xaneiro ás 15:00 horas diante do BUC Barcelona na cancha da Foixarda. Dirixirá o encontro a colexiada Elisabet Martínez.
Arestora, as lucenses ocupan o penúltimo lugar na táboa clasificatoria.
