O Diario Oficial de Galicia (DOG) recolle a lista de 22 persoas e entidades galardoadas cos Premios Deporte Galego que entrega a Xunta de Galicia e que aglutinan nesta ocasión catro anos, os que van do 2019 ao 2022.
A pandemia de COVID-19 fixo que os Premios Deporte Galego non se entregasen desde o a ano 2019. A gala de entrega destes galardóns terá lugar o vindeiro 20 de marzo no Auditorio Municipal de Ribeira e permite recuperar outra normalidade no deporte galego.
Na lista de galardoadas nos Premios Deporte Galego 2019-2022 están Teresa Portela, Ana Peleteiro, Adi Iglesias, Antía Jácome, todas elas olímpicas en Toquio, así como o equipo de fútbol sala feminino do Burela FS.
O Pescados Rubén Burela FS está considerado o mellor equipo do mundo no fútbol sala femino e gañador no período de análise (catro anos) de títulos como campión de Liga (2019-20 e 2022-21), campión de Copa da Raíña (2019, 2020, 2021 e 2022), campión da Supercopa de España (2019 e 2021, 2022), campión da Copa de Galicia (2019 e 2020), Medalla Castelao e Premio Meninas no 2022.
No caso das deportistas individuais, ademais doutros galardóns, cómpre significar o seu destacado papel nos Xogos Olímpicos e Paralímpicos. Adi Iglesias conseguiu un ouro nos 100ml e unha prata nos 400ml, nos dous casos na categoría T13, Teresa Portela foi prata no K1 200m, Ana Peleteiro colgouse o bronce no triplo salto e a padexeira Antía Jácome conquería un diploma (quinto posto) no C1 200m.
En total hai 18 premios e 22 persoas e entidades premiadas xa que houbo algunha cagoría que tivo galardóns ex aequo.
Nesta ocasión, os premios Premios Deporte Galego que recoñecen aos máis destacados axentes do ámbito deportivo de Galicia. En concreto nesta edición de 2019-2022 distínguense a 22 premiadas/os en 18 categorías. Esta é a lista de persoas e entidades premiadas:
- Mellor deportista feminina (ex aequo): María Teresa Portela Rivas (piragüismo) e Ana Peleteiro Brión (atletismo)
- Mellor deportista feminina con discapacidade: Adiaratou Iglesias Forneiro (atletismo)
- Mellor deportista masculino: Carlos Arévalo López (piragüismo)
- Mellor deportista masculino con discapacidade: Martín de la Puente Riobó (tenis en cadeira de rodas)
- Mellor equipo feminino: Club Deportivo Burela Fútbol Sala (fútbol sala)
- Mellor equipo masculino: Club Tríatlon Cidade de Lugo Fluvial (tríatlon)
- Mellor equipo de deportistas con discapacidade (ex aequo): Real Club Deportivo de la Coruña Genuine e Club Deportivo Lugo Genuine (fútbol)
- Mellor entidade na promoción do deporte de base: Club Básquet Coruña (baloncesto)
- Mellor adestrador ou adestradora: Miguel Martínez Méndez (baloncesto)
- Mellor árbitro/a ou xuíz/a: Manuel Franco Ojea (tenis)
- Mellor labor informativo: Galicia en Xogo Olímpico (Radio Galega)
- Mellor evento deportivo (ex aequo): Mundiais de Loita sub-23 e grappling de Pontevedra 2019 e O Gran Camiño Cycling 2022
- Mellor patrocinio deportivo: Recalvi
- Mellor deportista revelación: Antía Jácome Couto (piragüismo)
- Premio ao xogo limpo (ex aequo): Escolas de Balonmán Xiria e Bueu Atlético Balonmán (balonmán)
- Premio Galicia Saudable á entidade de carácter público destacada no fomento e promoción da actividade física e hábitos de vida activa: Instituto de Investigación Biomédica da Coruña – INIBIC Sergas
- Premio Galicia Saudable á entidade de carácter privado destacada no fomento e promoción da actividade física e hábitos de vida activa: Fundación Abrente – Enki
- Premio Galicia Saudable á entidade educativa destacada no fomento e promoción da actividade física e hábitos de vida activa: IES Manuel García Barros.
