O 2021 foi o ano de Teresa Portela. A padexeira galega fixo realidade o seu soño de acadar unha medalla olímpica, e tamén entrou na historia do deporte olímpico español ao se converter na muller española con máis Xogos Olímpicos disputados, van seis e se cadra… suma o sétimo! Hai Teri Portela para rato!
Como símbolo que é dos éxitos do deporte galego e español nos Xogos Olímpicos de Toquio 2021, a TVG elixiu á deportista galega como unha das persoas que participaron na transmisión das badaladas coa Berenguela desde a praza do Obradoiro en Santiago. Con ela, asomados á praza compostelá estiveron conducindo o espazo os presentadores do Malicia Noticias Arturo Fernández e Noelia Rey.
🍾🍇 Así foi a entrada da @TVGalicia no 2022! Para ver o especial completo das #BadaladasTVG non tes máis que visitar a nosa canle de YouTube ☺️👉 https://t.co/moF6KxU8ak #Feliz2022 pic.twitter.com/leUL9PhHn6
— TVG (@TVGalicia) January 1, 2022
Portela foi a encargada de dar paso aos saúdos das e dos deportistas
Moi elegante, vestida de vermello e coa súa medalla de prata na man, Teri Portela foi parte da despedida de ano 2021 desde a TVG. Foi ela a encargada de anunciar os saúdos que mandaban a toda Galicia as futbolistas do Pescados Rubén Burela FS, campioas de Europa e consideradas o mellor equipo de fútbol sala feminino do mundo, tamén do triatleta Javier Gómez Noya, a triatleta Susana Rodríguez Gacio que fixo ouro nos paraolímpicos de Toquio 2021 e do baloncestista Fernando Romay.
Nas badaladas tamén estiveron o trío de pandereteiras Tanxugueiras e xustamante foi o tema Terra destas cantareiras o elixido pola subcampioa olímpica para, hoxe, narrar a experiencia e compartila coas persoas que a seguen. Así, Teresa Portela montou un reel en instagram coa música do tema Terra que as Tanxugueiras presentan para Eurovisión. Sinerxias entre mulleres galegas triunfadoras, nunhas na música e a outra no deporte, que acadaron éxitos no 2021 e que, todo indica, que entran tamén no 2022 con bo pé.
Ver esta publicación en Instagram
Durante a transmisión, Teresa Portela contaba a anécdota de que na súa casa sempre se tomaban uvas pasas, e tardou anos en saber que iso era so na casa dos Portela e que o resto do mundo optaba polas uvas frescas. Para non perder a tradición familiar, a padexeira optou polas pasas para contar as badaladas coas que entrou no 2022.
