Teresa Portela optará ao Premio Princesa de Asturias dos Deportes na súa próxima edición do 2022. A Xunta de Galicia, tal e como informa nunha nota, vén de entregar á Fundación a candidatura da deportista para o Premio que será entregados na segunda quincena do mes de outubro.
A candidatura da padexeira galega céntrase no seu “brillante currículo deportivo con 15 medallas mundiais e 17 europeas”. En Toquio converteuse na muller española con maior número de participacións olímpicas, cun total de seis, e acadou unha medalla de prata aos seus 39 anos despois de xuntar cinco diplomas olímpicos.
No momento actual, Portela prepara no Complexo de Regatas de Verducido a súa clasificación os seus sétimos Xogos. Máis aló do terreo deportivo, é salientable a súa carreira académica coa diplomatura en Maxisterio de Educación Física, o grado en Fisioterapia e o grado de Ciencias dos alimentos que está a cursar na actualidade.
Ademais, segundo apunta a Secretaría Xeral para o Deporte, “o xeito en que compatibiliza a maternidade co deporte de alto nivel serve a moitos e moitas como motivación para loitar polo que se quere acadar e manda unha mensaxe á sociedade na que o deporte é un compañeiro indisociable en calquera etapa da vida”.
Múltiples apoios para Portela
A candidatura de Teresa Portela presentada pola Xunta vén avalada por preto de 3.500 votos populares e 175 cartas de apoio.
Así, a Secretaría Xeral para o Deporte agradeceu a colaboración prestada pola cidadanía e institucións que prestaron o seu apoio e colaboraron na candidatura, nomeadamente, a International Canoe Federation, o Consejo Superior de Deportes, a Delegación do Goberno en Galicia, as tres universidades galegas, as catro deputacións provinciais, o Clúster Galego da Industria do Deporte e o Benestar e ás súas empresas asociadas, a AGAXEDE, a FEGAMP, oito federacións deportivas nacionais, 56 galegas, seis agrupacións deportivas, 48 concellos galegos, 28 clubs deportivos e 11 medios de comunicación.
