Despois de comezar a segunda volta cunha derrota, o Conservas Orbe Rubensa BM Porriño ten unha nova oportunidade de sumar os puntos da vitoria. Este sábado, 23 de xaneiro, ás 19:00 horas, visitarán ao Club Balonmano Morvedre.
Esta nova xornada da Liga Guerreras Iberdrola trae un duelo entre dous rivais directos na clasificación. Galegas e valencianas están separadas por tres puntos, coas xogadoras do Porriño lixeiramente por enriba.
Tendo gañado un cuarto dos partidos disputados, as porriñesas suman cinco puntos, fronte aos dous do Morvedre. Unha das dúas vitorias que logrou o plantel dirixido por Isma Martínez foi precisamente ante as valencianas.
A ida foi para o BMa Porriño
O partido de ida foi o debut en casa das galegas esta tempada, e tamén o primeiro trunfo. Aquel 19 de setembro, o Porriño logrou impoñerse en casa cun 29-19, principalmente grazas ao acerto de xogadoras como Soraia Vieira e Mónica Oliveira, ambas con cinco goles cada unha.
O primeiro encontro entre estes dous equipos neste curso tivo unha primeira metade moi igualada. O Porriño comezou forte en casa, facéndose co control do partido ata o minuto 15, cando as visitantes colleron forza e comezaron a responder. Para o tempo de descanso, as galegas lograban a vantaxe de só dous tantos.
Na segunda parte, as xogadoras de Martínez aumentaban gol a gol a distancia coas valencianas, situándose por enriba, nunha posición que xa non soltarían ata a fin do encontro.
Dúas das mellores goleadoras están no plantel galego
Malia que a volta promete ser un partido igualado e difícil para ambos conxuntos, o Porriño conta coa baza de ter nas súas filas a dúas das máximas anotadoras do Grupo B.
Trátase das xa mencionadas Soraia Vieira e Mónica Oliveira, que ocupan a terceira e cuarta posicións respectivamente. Vieira suma nesta tempada 39 tantos, cunha media de 4,88 goles por partido. A súa compañeira, Oliveira, ten tres goles menos, cunha media moi similar, de 4,5 tantos por duelo.
No bando rival, o Morvedre deberá tirar máis da defensa para esta cita. As valencianas forman o equipo máis goleado do Grupo B da categoría de ouro, e tamén son as que teñen unha diferencia maior entre goles a favor e en contra.
O partido poderá seguirse vía streaming no Youtube do Balonmano Morvedre.
DHF| Este sábado nuestro primer equipo se enfrentará al @BMMorvedre en su casa‼️
⏰ 19:00
📍 Pabellón René Marigil
🔴 En directo por YouTube#aRevolta #LigaGuerrerasIberdrola pic.twitter.com/A3bPLwR6Wi— Club Balonmano Porriño (@BmPorrino) January 21, 2021
