Aínda que non se teña movido postos na táboa, a vitoria do Conservas Orbe Rubensa BM Porriño ante o Adesal Córdoba é un importantísimo paso para as galegas de cara a afastarse dos postos perigosos da clasificación e pensando na segunda parte da competición. Con este trunfo traballado e loitado por 25-21, as galegas levan dous partidos gañados de xeito consecutivo. Estos dous puntos colleitados na 14ª xornada supoñen un balón de osíxeno para as do Porriño.
O Adesal tardou uns minutos en entrar no choque, algo que non desperdiciaron as galegas para iniciar o marcador que abría Inés Hernández. Co paso dos minutos o xogo se iría volvendo cada vez máis parello. De feito, no electrónico, a igualada ou único un punto por riba das locais era a tónica minuto tras minuto. Sucedíanse os ataques e o Conservas Orbe Rubensa BM Porriño non conseguía despegarse.
O Adesal ponse por diante do Porriño
Aos 15 minutos de xogo, as andaluzas acadaron por primeira vez poñerse por diante. Un gol de Arminia Isic colocaba o partido 6-7. Esta tímida vantaxe visitante non durou máis ca un suspiro e as galegas volveron pór as táboas no marcador (7-7). De novo Arminina Isic, era a artífice da maior distancia que collerían en todo o partido as visitantes 8-10.
Isma Martínez viulle as orellas ao lobo e pediu tempo morto. Desde ese momento o partido mudou de rumbo. Outra vez, as galegas recurtaban e, desta volta, para non deixar que as cordobesas volveran a pórse por diante en todo o encontro. De aí ao final da primeira parte, o Conservas Orbe Rubensa BM Porriño iría collendo distancias ata chegar ao descanso cun 15-11 que asinaba, case sobre a bucina, unha das xogadoras destacadas do partido, Anthía Espiñeira.
A segunda metade foi das galegas
Xa na segunda metade, a igualdade da primeira parte foi quedando no pasado. As galegas foron xestionando a súa vantaxe de catro goles. As andaluzas so chegaron a achegarse a dous puntos (17-15) no minuto 6 do segundo periodo, de novo, o remate foi de Arminia Isic. Non sendo a máxima goleadora do Adesal Córdoba, o certo é que foi a xogadora que anotou os tantos que máis meteron no partido ás andaluzas.
Os contragolpes das galegas do BM Porriño foron conseguindo recuperar esa distancia no marcador. Mónica Oliveira sería a autora do último tanto das galegas que se quedaron a un gol de igualar o golaverage do partido da ida na Fuensanta. Unha cuestión que pode non ser de pequena importancia de cara á segunda fase da competición cando, previsiblemente, ambos os dous equipos loiten por manterse na Liga Guerreras Iberdrola o vindeiro curso.
Deste xeito, a defensa das de Ismael Martínez, sumada ao acerto de Estela Carrera na portaría, gañoulle a partida aos ataques das andaluzas do Adesal Córdoba que adestra Rafa Moreno.
O @BmPorrino afástase dos postos perigosos co segundo triunfo consecutivo na #LigaGuerrerasIberdrola diante do @BalonmanoAdesal @RFEBalonmano
🔹Decisivo un parcial de 9-1 mediado o encontro (do 8-10 ao 17-11)
🔹Anthía Espiñeira, Inés Hernández e Ana Cerqueira, as goleadoras pic.twitter.com/hUloMzuQMi— En Xogo tvG2 (@EnXogo_tvG2) February 28, 2021
FICHA TÉCNICA
25) CONSERVAS ORBE RUBENSA PORRIÑO: Estela Carrera, Lopes (3), Alba Dapena (3), Inés Hernández (4), Ana Isabel Cerqueira (4), Anthía Espiñeira (5) e Soares (-) – sete inicial -. Tamén xogaron: Alicia Campo (1), Sarai Samartín (1), Mónica Oliveira (2), Sandra Fernández Couñago (2), Arima López (-), Aitana Santomé (-), Ayelén (-), Tavares e Carme Castro (-).
21) ADESAL CÓRDOBA: González, Bonazzola (1), Roda (2), Reyes (7), Vacas (-), Guerisoli e López (6) – sete inicial -. Tamén xogaron: Arminia Isic (4), Monros (-), Chelaru (-), Valero (-), Ruiz (1) e García (-).
MARCADOR CADA CINCO MINUTOS: 3-2, 5-3, 6-6, 9-10, 11-11 e 15-11 – descanso – 17-13, 19-16, 21-17, 22-18, 22-19 e 25-21.
ÁRBITROS: Hoz e Riloba. Excluíron a Espiñeira, Alba Dapena e Hernández, no BM Porriño, así como a Arminia Isic, Álvarez e Chelaru, no Adesal Córdoba.
INCIDENCIAS: Partido correspondente á 14ª xornada do Grupo B da Liga Guerreras Iberdrola disputado no pavillón Municipa do Porriño.
