O Pavillón Municipal Carrús será testemuña este sábado, 13 de febreiro, ás 18:00 horas do enfrontamento entre o Club Balonmano Elche (visitelche.com) e o Conservas Orbe Rubensa BM Porriño. Este partido enmárcase na undécima xornada da Liga Guerreras Iberdrola.
O Porriño deberá facer fronte a un conxunto forte na zaga. “É un equipo que nos vai poñer en moitísimos problemas coa súa defensa, xa que xera moitos erros do rival”, advirte o adestrador, Isma Martínez.
Xogadoras como Ivet Musons, Ana Martínez e Lysa Tchaptchet no bando local serán o principal perigo que deberán controlar as pupilas de Martínez.
As galegas chegan dunha dolorosa derrota xestada nos últimos minutos do duelo ante o Balonmano Salud Tenerife, cun resultado de 25-26. Tras esta cita, o Porriño ocupa a antepenúltima posición con cinco puntos.
Con sete máis está o Elche, que só perdeu nunha ocasión, contra o Rocasa Gran Canaria por un punto (21-22). Porén, as que serán locais para este duelo levan unha tempada apartadas da pista. A COVID-19 obrigounas a adiar varios dos seus partidos programados, polo que compite con tres partidos aínda por disputar. Algo que non impide que se sitúa nunha boa posición, no cuarto lugar con 12 puntos.
O partido poderá verse vía streaming a través do Youtube do Elche.
O Porriño mira máis alá
O enfrontamento preséntase complicado para as galegas, pero Isma Martínez apunta que irán a pola vitoria, sobre todo polo que significaría a nivel mental. “Vennos moi ben para coller esa confianza que non demostramos o sábado e, sobre todo, para prepararnos para o partido do martes que si é unha final”, afirma o técnico.
Isma Martínez: “Ambos equipos loitamos por cousas distintas”
O deste sábado será un encontro no que as galegas deberán manter a concentración, aínda que teñen a vista xa posta na recuperación do partido do martes ante o Morvedre. En palabras do técnico, o enfrontamento desta fin de semana perde, por este motivo, “un pouco de competitividade. Ao final é bastante claro que ambos loitamos por cousas distintas”.
DHF| Este sábado nos toca viajar a Elche ‼️
🆚@cbm_elche
⏰18:00
📍Pabellón Municipal Carrús
🔴En directo por YouTube#aRevolta #LigaGuerrerasIberdrola pic.twitter.com/pV7iRcViLO— Club Balonmano Porriño (@BmPorrino) February 11, 2021