A segunda fase da Copa da Raíña de balonmán chega esta semana para o Conservas Orbe Rubensa BM Porriño. As galegas teñen unha dobre cita co Aula Alimentos de Valladolid, cun partido de ida este mércores, 27 de xaneiro, ás 20:00 horas no O Porriño.
Esta cita estivo a piques de adiarse. As visitantes xogaron a pasada fin de semana co Zuazo, que anunciou esta semana un positivo en COVID-19 no seu club. Despois de confirmar os tests negativos entre as vallisoletanas, a eliminatoria celebrarase con normalidade.
O rival do Porriño é, segundo Isma Martínez, o adestrador das galegas, “o equipo que seguramente mellor se reforzou, creo que tocou todos os postos claves que melloraron moitísimo o equipo”.
Isma Martínez: “(O Aula) tocou todos os postos claves que melloraron moitísimo o equipo”
Sobre as novas fichaxes das vallisoletanas, Martínez destaca o talento de xogadoras como Danila e Lorena Téllez para o lanzamento exterior, e de Jimena e Parra como xoves promesas e aposta polo futuro.
As claves do Porriño para gañar
O adestrador ten as cousas claras para esta eliminatoria de Copa da Raíña. Coñece ben o xogo rival, xa que “ao final o Aula é un equipo moi recoñecible que leva moitos anos xogando sempre ao mesmo. Ten un contraataque letal e unha transición forte”, resume.
Por iso, para vencer, o Porriño deberá evitar que “se sintan cómodas na transición e pechar o lanzamento exterior e non deixar xogar cómoda a Teresa“.
Isma Martínez: “Cos paróns e todo, é difícil levar un ritmo de competición normal para as datas nas que estamos”
Ás virtudes do rival súmanse as complicacións que están a vivir as galegas. “Esperamos que o equipo responda ben, porque ao final tivemos unha viaxe larguísima e só teremos dous adestramentos. Cos paróns e todo, é difícil levar un ritmo de competición normal para as datas nas que estamos”, recoñece Isma Martínez.
Actualmente, o Porriño ocupa a sexta posición do grupo B da máxima categoría do balonmán español. Con cinco puntos, as galegas sitúanse a seis do cuarto clasificado, o Liberbank Gijón.
O equipo de Martínez chega nun momento complicado. Dos tres últimos partidos disputados, as galegas acumulan tres derrotas, polo que a nivel deportivo e mental, gañar nesta eliminatoria é moi importante.
Pola súa parte, o Aula Alimentos milita no grupo A da Liga Guerreras Iberdrola, na que ocupa a cuarta posición con dez puntos tras gañar na última xornada ao Zubileta Evolution Bm Zuazo. Este conxunto é o contrincante do Guardés para a Copa, pero un positivo nas filas vascas obrigou a adiar os partidos da clasificatoria.
Ante esta noticia, as vallisoletanas realizaron tests preventivos este martes, con resultados negativos. O partido entre as xogadoras de Martínez e o Aula Alimentos deste mércores poderá seguirse vía streaming a través do Youtube do Porriño. A volta celebrarase en Valladolid o sábado, ás 19:00 horas.
DHF| Este miércoles se juega el primer partido de la segunda ronda para clasificarse a la Copa de la Reina ‼️
🆚 @BmAulaCultural
⏰20:00
📍 Pabellón Municipal de O Porriño
🔴 En directo por YouTube#aRevolta #CopadelaReina pic.twitter.com/vojBOjRsuD— Club Balonmano Porriño (@BmPorrino) January 25, 2021