Remata a primeira fase da Liga Guerreiras Iberdrola e o fai con derrota para o Conservas Orbe Rubensa BM Porriño. As galegas recibiron ás segundas clasificadas, o Rocasa Gran Canaria, ás que conseguiron plantarlle cara pero non rematar o partido. Así, o resultado final foi un axustadísimo 28-29.
Este partido, ao enfrontar a dous equipos de zonas distintas da táboa, non tivo moita relevancia para a clasificación final. Porén, como indicaba o adestrador Isma Martínez na previa, a actuación do Porriño debería servir para conller boas sensacións.
Cun gran partido ante as canarias, as galegas poden esquecer esta derrota e prepararse para afrontar a segunda fase da competición, na que loitarán por non descender.
Vitoria do Porriño na primeira metade
Nos primeiros minutos do encontro as galegas sentíanse cómodas na casa, controlando o ritmo do partido e anotando fluidamente, especialmente grazas a Sandra Fernández e Anthia Espiñeira.
O xogo local inmobilizaba ás visitantes, que non foron quen de abrir o marcador ata o minuto catro do partido, cun tnato de Iara Grosso. Pero nin co estreado acerto do Rocasa o conxunto de Martínez freou, de forma que pasados os primeiros dez minutos, o electrónico anunciaba a vitoria local por un 9-7.
Cunha defensa contundente combinada cun ataque efectivo, o Porriño seguía medrando no marcador, forzando ao técnico rival a parar o reloxo a dez minutos do descanso.
Pero as indicacións de Carlos Herrera non xurdiron efecto nas canarias, que vían como as locais aumentaban a súa renda antes da pausa. Cun ataque dinámico e un movemento de balón rápido, o Porriño poñíase a tres puntos por diante das rivais.
Reacción visitante
Despois da reanudación, o conxunto galego seguiu realizando unha gran actuación no pavillón, mantendo a distancia co Rocasa conseguida na primeira metade.
Destacaba especialmente a xuvenil Marta Da Silva, peza clave no xogo rápido, utilizando intelixentemente o pivote e os extremos. Nas xogadas de defensa, as estrelas eran Begoña Otero e Estela Carrera, dúas gardametas que mantiñan ás canarias por debaixo.
Porén, o Rocasa quixo facer gala dos resultados que o levaron a ser un dos mellores equipos do seu grupo, e non daba o partido por perdido. As de Herrera comezaban a recortar distancias, conseguindo poñerse a só un gol a falta de dez minutos. Co Porriño vendo a súa vitoria perigar, comezou un xogo con oportunidades para ambos conxuntos.
Xa no último minuto, as galegas víanse por debaixo e tiveron a oportunidade de empatar, pero Ana Palomino parou o penalti que lanzaba Soraia Lopes. Co pitido final confirmouse a derrota local (28-29), despois de ir por diante durante a meirande parte do encontro.
A segunda fase
Coa recuperación desta xornada remata a primeira fase da Liga Guerreiras, cuxos equipos agora se dividirán no grupo de loita polo título e o de loita por non descender.
Neste segundo grupo estará o Porriño, que se enfrontará o próximo 27 de marzo ao Uneatlantico Pereda, na primeira xornada desta segunda fase.
FICHA TÉCNICA
28) CONSERVAS ORBE RUBENSA PORRIÑO: Anastasija Doder (2), Alicia Campo (2), Andrea Amarilla (1), Marta Da Silva (2), Inés Hernández (2), Soraia Lopes (5), Aitana Santomé (1) – sete inicial -. Tamén xogaron: Arima López 1), Alba Dapena, Claudia Kaulback (2), Anthia Espiñeira (4), Sarai Samartin (1), Sandra Fernández (5), Fátima Ayelén, Estela Carrera e Begoña Otero.
29) ROCASA GRAN CANARIA: Melania Falcón, Iara Grosso (1), Arinegua Pérez (1), Paula Valdivia (2), Alba Spugnini (3), Seynabou Mbengue (6), Haridian Rodríguez (6) – sete inicial -. Tamén xogaron: María Gomes (2), Tiddara Trojaola (6), María González, Nerea Guerra, Mizuki Hosoe (2), Inés Sánchez e Ana Palomino.
MARCADOR CADA CINCO MINUTOS: 4-1, 6-4, 9-7, 10-11, 13-13, 17-14, – descanso -, 21-17, 23-19, 24-22, 26-25, 26-27, 28-29.
ÁRBITROS: Pedro Eiras e Lucas Crespo. Excluíron a Anastasija Doder, Andrea Amarilla, Arima López e Claudia Kaulback por parte do Porriño; e a Paula Valdivia, Alba Spugnini, Seynabou Mbengue, Haridian Rodríguez e María Gomes por parte do Rocasa Gran Canaria.
INCIDENCIAS: Partido correspondente á 12ª xornada do Grupo B da Liga Guerreras Iberdrola disputado no pavillón Municipal do Porriño.
