Non puido ser. Pese a loitar e moito, por facerse cun lugar na fase final da XLIV Copa da Raíña que se vai disputar en Málaga en abril, o Conservas Orbe Rubensa BM Porriño non puido superar ao BM Elche e acadar o seu billete.
Sabíase que o Atticgo Bm Elche ía ser un rival difícil de vencer. O conxunto visitante que viña dunha dinámica moi boa nas últimas xornadas da liga Guerreras Iberdrola. Aínda así, o equipo porriñés xogaba cun punto ao seu favor: a pista e a súa afección. O Pavillón Municipal do Porriño acollería un dos encontro copeiros que aspiraba a ser o máis igualado e con máis emoción.
O Atticgo Bm Elche empezou movendo a bóla con Nuria Andreu aos mandos e Pipy Wolfs convertería o seu lanzamento desde a liña de penalti en gol abrindo o marcador a favor do seu equipo. Non tivo a mesma sorte, o Conservas Orbe Rubensa BM Porriño que estaba a atopar dificultades para atacar a defensa ilicitana e que as mantería durante todo o primeiro tempo.
Casasola rompería a seca de máis de catro minutos na que estaba sumida o equipo porriñés e poñería o empate no electrónico (1-1). A defensa do Atticgo Bm Elche estaba a ser moi contundente e cambiante dependendo do momento de xogo no que se atopaba o seu rival.
Pasados os primeiros 10 minutos, o resultado mostraba igualdade (3-3). A defensa porriñesa foise crecendo co paso dos minutos que, xunto coas achegas de Estela Carrera baixo paus, mantíñalles preto no marcador. Con todo, as dificultades que estaban a atopar na faceta ofensiva o equipo local estaban a facerse notar. Así, no minuto 15, o Atticgo Bm Elche puxera o marcador ao seu favor cun parcial de 1- 4 ao seu favor.
Tras un contrataque de Aitana Santomé, o Conservas Orbe Rubensa poñeríase un tanto por baixo no minuto 17. Non tardaría Caro Bono en volver poñer o empate no electrónico e volver incorporar ao seu equipo na loita pola vitoria. A portería do Atticgo Bm Elche tamén se estaba facendo notar coas grandes intervencións de Nicole Morais.
A falta de cinco minutos para que finalizase o primeiro tempo, o equipo de ilicitano volvía estar por encima no marcador cun 7-9. O equipo de Rocamora púxose tres goles por encima a falta de catro minutos para terminar a primeira parte. #Ante iso, Isma Martínez solicitou o primeiro tempo morto do partido. Tras el, Carmen Prelchi conseguiu un sete metros a favor do seu equipo e a encargada de transformalo sería Caro Bono. Chegou o final da primeira parte e o Conservas Orbe Rubensa BM Porriño foise ao descanso por baixo no marcador (8-12).
Final da primeira parte ‼️
Conservas Orbe Rubensa Bm Porriño 8🆚 @cbm_elche 12
💻En directo por: https://t.co/Yb4oVjFklZ
Imos rapazas, aínda queda moito tempo💪👑#copadelareina pic.twitter.com/JWZBhB3cur
— Club Balonmano Porriño (@BmPorrino) January 28, 2023
Esta vez, sería a quenda do Conservas Orbe Rubensa BM Porrriño de poñer en movemento o balón e neste ataque, Buforn estrearíase no partido. Neste inicio, ambos os equipos estaban a competir cunha gran intensidade. Pero, o que máis estaba a destacar era o traballo nas porterías dos dous conxuntos con grandes paradas.
Aos poucos, o Conservas Orbe Rubensa BM Porrriño foi recortando distancias. En ataque, o equipo galego estaba a optar por ataques posicionales cun xogo de cruces entre as xogadoras, pero non estaban a transformar os lanzamentos en gol. En defensa, as porriñesas continuaban apostando por un 6:0 con moitas disuasiones. Minuto 10 do segundo tempo e o marcador estaba 13-15 a favor das ilicitanas.
OConservas Orbe Rubensa BM Porrriño non daba roto a barreira de dous goles que lles separaba do empate, pero Alicia Campo sería a encargada diso co seu gol desde o pivote. Ao verse tan só un gol por baixo, Rocamora pediu tempo morto.
Xa preto do último cuarto, minuto 14:08, o Atticgo BM Elche enfrontábase a unha dobre exclusión. Nestes minutos, o Conservas Orbe Rubensa BM Porrriño empataría de novo o partido que estaba a ser unha continuo tira e afrouxa.
Entrados nos últimos 10 minutos, o resultado estaba de novo a favor do Atticgo (16-19). O Conservas Orbe Rubensa estaba a volver a ter problemas en ataque.
Buforn botouse o equipo ás costas tras dous goles desde a liña de penalti. Non sería menos e Fátima Ayelén pararía un penalti que aproveitaría o seu equipo para que Carmen Prelchi puxese o empate a falta de 5:30 minutos para o final. A defensa porriñesa creceu cos ánimos da súa afección.
Un gol abaixo para o Porriño a un minuto do final
Os últimos minutos estaban a ser frenéticos no Municipal do Porriño. A falta dun minuto para o final, o marcador estaba con 19-20 en contra do conxunto local e tras o penalti marcado por Pipy Wolfs para coller unha vantaxe de dous goles para o seu equipo, Martínez pediu tempo morto e co que o conxunto porriñés conseguiría un penalti ao seu favor transformado de novo por Buforn.
A falta de 10 segundos, o Conservas Orbe Rubensa subiu o seu defensa e sería a quenda de Rocamora para o tempo morto. Despois diso, Guilabert marcaría gol e con iso, o Atticgo BM Elche sentenciaría o seu pase a cuartos para a Copa da Raíña. O Porriño, a pesar de loitar ata o final, non puido darlle a volta ao resultado (20-22).
Non puido ser. A pesar de loitar ata o final, o noso equipo non estará na próxima Fase Final da #copadelareina 👑
Conservas Orbe Rubensa Bm Porriño 20🆚 @cbm_elche 22
🔴 Grazas a toda a afición e grazas a este equipo por facernos disfrutar. Cabeza moi arriba
📷 @xoelgil pic.twitter.com/l5nLdessTO
— Club Balonmano Porriño (@BmPorrino) January 28, 2023
FICHA TÉCNICA
20) CONSERVAS ORBE RUBENSA BM PORRIÑO: Carolina Bono (3), Micaela Casasola (3), Alicia Campo (1), Malena Valles (3), Inés Hernández, Aitana Santomé (1), Ariana Portillo (1), Maider Barros (1), Sarai Samartín (1), Paulina Buforn (5), Carmen Prelchi (1), Carme Castro, Fátima Ayelén, Estela Carrera e Begoña Otero.
22) ATTICGO BM ELCHE: Ekaterina Zhukova, Tessa Van Zijl (3), Lisa Oppedal, Celia Guilabert (4), Patricia Méndez, Nuria Andreu, Danila So Delgado (4), Clara Gascó, María Flores, Zaira Benítez (2), Pipy Wolfs (4), Paola Bernabé (2), Alexandra Do Nascimento (3), Raquel Moré, Pamela Rodrigues e Nicole Morales.
MARCADOR CADA CINCO MINUTOS: 1-1, 3-3, 4-7, 7-7, 7-9, 8-12, DESCANSO, 10-13, 13-15, 16-19, 19-19, 20-22.
EQUIPO ARBITRAL: A parella arbitral estivo formada por José Carlos Friera e Andrés Rosendo. Por parte do Conservas Orbe Rubensa Bm Porriño excluíron a Inés Hernández e Maider Barros. Nas filas do Atticgo BM Elche excluíron a Ekaterina Zhukova, Patricia Méndez, Danila So Delgado e María Flores.
INCIDENCIAS: Partido correspondente á segunda fase da XLIV Copa de S.M. a Raíña.