Chega o ecuador da fase pola permanencia na Liga Guerreras Iberdrola e o Conservas Orbe Rubensa BM Porriño quere defender a súa segunda posición. Nesta cuarta xornada, as galegas reciben ao Lanzarote Puerto del Carmen, e a cita será este sábado, 24 de abril, ás 18:00 horas.
Para o adestrador das conserveiras, Isma Martínez, a clave do duelo estará no aspecto técnico. “Debemos xestionar ben as desigualdades que é onde estamos fallando, pero collemos un ritmo bo de xogo. Temos que intentar explotar a nosa superioridade e intentar seguir co ritmo alto de xogo”, declarou.
Isma Martínez: “Debemos xestionar ben as desigualdades que é onde estamos fallando, pero collemos un ritmo bo de xogo”
Así ve Isma Martínez ao Lanzarote Puerto del Carmen, rival do Porriño
O equipo canario pasou á fase pola permanencia como último do seu grupo, o A, e nesta nova fase aínda non foi quen de vencer en ningún encontro. Desta forma, son colistas e actualmente favoritas ao descenso.
A súa posición non debe ser motivo de confianza para o Porriño. O seu adestrador advirte que “é un equipo que estivo competindo ben todo o ano. É certo que non foi capaz de puntuar, pero competiu moi dignamente e iso vése nos últimos partidos”.
Isma Martínez sobre o rival: “É certo que non foi capaz de puntuar, pero competiu moi dignamente”
Martínez explica que, se ben é certo que o Puerto del Carmen perdeu a Keyla que marchou ao Logroño, as canarias incorporaron a Tamara Jovicevic, “que ten un lanzamento exterior incríble e está asumindo a finalización ofensiva”. Para o técnico do Porriño, outras das xogadoras destacadas do rival son Rosa Álvarez ou Topic, pola súa veteranía na Liga.
Porén, independentemente do rival, o Conservas Orbe Rubensa BM Porriño debe traballar centrado en si mesmo. “Temos que seguir na nosa liña, intentar facer un oito de oito que é o que nos plantexamos nun principio. É un partido que pode servirnos para despegar definitivamente e deixar un pouco máis encarrilado o tema da salvación”.
O encontro retransmitirase vía streaming a través do Youtube do BM Porriño.
