- O Conservas Orbe Rubensa BM Porriño logra impórse ao Mecalia Atlético Guardés nun derbi ligueiro logo de case sete anos (24-20),
Case sete anos despois, o Mecalia Atlético Guardés perdeu un derbi contra o Conservas Orbe Rubensa BM Porriño. Sucedeu no Municipal da localidade porriñesa, nun duelo rexional que se definiu na segunda metade a favor dos locais grazas, en boa medida, á gran actuación da ex porteira do conxunto miñoto Estela Carrera. Desta forma, o equipo que dirixe Abel González continúa sen coñecer a vitoria a domicilio no que vai de curso e o que prepara Ismael Martínez adxudícase o primeiro derbi galego desta tempada 2022-23 na Liga Guerreras Iberdrola.
Viviuse no Porriño un choque repleto de ambiente festivo. Escoitouse o himno galego antes de comezar o primeiro derbi oficial deste curso en liga, e houbo unha intensa animación por parte da afección de ambos os dous equipos.
Comezou o derbi galego da Liga Guerreras Iberdrola con alternativas en ambas as áreas e coas dúas porteiras, Estela Carrera polas locais e Marisol Carratú polas visitantes, moi vivas e resolutivas baixo paus.
O Mecalia Atlético Guardés tratou de acelerar no tramo final do primeiro acto. Ángela Nieto sumaba tres tantos, ademais dun gran rendemento no centro do 6:0. Pero, dun ataque visitante para marcharse a tres goles de diferenza, pasouse a unha redución de distancias por parte do Conservas Orbe Rubensa BM Porriño que estreitou á mínima expresión o marcador ao descanso (11-12).
Estela Carrera, a gran baza do Porriño para evitar que o Guardés recurtase distancias
Á volta dos vestiarios, Estela Carrera subiu aínda máis o nivel e negou o gol unha e outra vez ás xogadoras do Mecalia Atlético Guardés, que non deixaron de tentalo en ningún momento sen éxito. Boa parte do triunfo final das locais reside nas estiradas da cancerbeira, que, curiosamente, é ex xogadora don conxunto visitante, así que sabe o que é defender as porterías de Porriño e Guardés.
O bloque de xogadoras que prepara o técnico Abel González deixáronse a pel na pista por manterse no partido, pero as paradas da gardameta do Conservas Orbe Rubensa BM Porriño impedíano.
Outra ex xogadora do equipo miñoto, Paulina Buforn, tirou do carro porriñés en ataque e cos seus nove tantos abriu unha brecha de catro goles que resultou definitiva. Din que non hai peor cuña ca da propia madeira, e no caso deste derbi galego así parece que aconteceu.
O equipo da Guarda remou e remou ao final do choque buscando un mellor resultado, con Sandra Santiago como protagonista na faceta goleadora, pero entre o gran nivel de Estela Carrera e a falta de tempo, non fixo posible máis que achegarse ata aos dous goles como moito.
Así se confirmou a vitoria do Conservas Orbe Rubensa BM Porriño ante o Mecalia Atlético Guardés, a primeira nun derbi de Liga Guerreras Iberdrola tras case sete anos.
FICHA TÉCNICA
24) CONSERVAS ORBE RUBENSA BM PORRIÑO (11+13): Estela Carrera (porteira), Mica Casasola (5), Alicia Campo, Malena Vales (3), Inés Hernández, Ayelén Rosález (porteira), Aitana Santomé, Ari Portillo, Maider Barros (3), Sarai Samartín, Paulina Buforn (9), Carmen Prelchi (1), Carme Castro (3), Marta Groba, Lucía Méndez e Bego Otero.
20) MECALIA ATLÉTICO GUARDÉS (12+8): Marisol Carratú (porteira); África Sempere (1), Sandra Santiago (6), Giselle Menéndez, Ángela Nieto (4), Pauli Fernández, Míriam Sempere (p.), Cris Cifuentes, Patrícia Lima (4), Celia García, Elena Amores (1), Carla Gómez (1), María Sancha (1),Júlia Noz e Daniela Moreno (2) e Aroa Fernández.
MARCADOR CADA CINCO MINUTOS: 2-2, 4-4, 6-7, 9-8, 10-11, 11-12 – descanso- 13-13, 15-13, 18-15, 20-16, 21-18 e 24-20.
EQUIPO ARBITRAL: José Carlos Fritise e Andrés Rosendo. Excluíron con dous minutos ás xogadoras locais Aitana Santomé, Sarai Samartín e Carmen Castro e ás visitantes África Sempere, Ángela Nieto, Patrícia Lima e Carla Gómez.
INCIDENCIAS: Partido da sétima xornada da Liga Guerreras Iberdrola disputado no pavillón Municipal do Porriño. Primeiro derbi do balonmán feminino galego na máxima categoría estatal neste curso 2022-23. O encontro foi televisado pola TVG2.
