Este sábado, 15 de maio, o Conservas Orbe Rubensa Porriño ten unha nova cita. O duelo da sétima xornada do grupo polo descenso da Liga Guerreras Iberdrola enfronta ás galegas co Zubileta Evolution BM Zuazo. O encontro terá lugar no pavillón municipal do Porriño ás 20:00 horas.
Coa tempada a piques de rematar, as porriñesas xa están salvadas, pero o seu afán competitivo lévaas a loitar polo primeiro posto da táboa.
Este poderá ser un duelo vital na consecución do obxectivo. En palabras do adestrador, Isma Martínez, “creo que é o partido decisivo para intentar ser primeiras de grupo, creo que gañándoo asegurariamos mínimo o segundo posto. Entón, creo que é importante para o obxectivo que nos marcamos a principio desta segunda fase”.
Isma Martínez: “Creo que é o partido decisivo para intentar ser primeiras de grupo, creo que gañándoo asegurariamos mínimo o segundo posto”
Por estes motivos, o técnico afirma con contundencia que o equipo intentará “ser o máis competitivo posible” no duelo deste sábado. Como contratempo, estarán as lesións de xogadoras como Soraia Lopes ou Fátima Ayelén, que dificultarán as rotacións no Porriño.
Dous postos separan aos conxuntos do Porriño e o Zuazo
Tendo en conta o nivel segundo a clasificación de ambos equipos, prevese un encontro disputado no pavillón do Porriño. Por algo ambas as dúas escuadras están separadas unicamente por dous postos na táboa clasificatoria.
As locais son primeiras do grupo, cun total de 18 puntos e a permanencia asegurada. No último encontro, as galegas do Conservas Orbe Rubensa Porriño empataron co CICAR Lanzarote Ciudad de Arrecife.
Pola súa parte, o rival desta sétima xornada, o Zubileta Evolution BM Zuazo, obtivo no seu último partido unha vitoria cun resultado de 24-22 ante o Club Balonmano Morvedre. Con este trunfo, o equipo de Barakaldo sitúase no terceiro posto, tamén con 18 puntos.
Isma Martínez analizou ás contrincantes da fin de semana, un equipo co que empatan a puntos e cunha traxectoria similar. “Zuazo é moi bo equipo e está moi ben traballado. Teñen unha defensa proactiva que recupera moitísimos balóns e que fan dudar moitísimo nas situacións tácticas do rival”, avisa.
Isma Martínez: “Debemos simplificar o xogo e xogar situacións tácticas moi simples. A clave vai estar no xogo sen balón”
Así mesmo, o adestrador das conserveiras sitúa nas xogadas simples a clave para levarse o encontro: “Debemos simplificar o xogo e xogar situacións tácticas moi simples. A clave vai estar no xogo sen balón”.
En resumo, o técnico asegura que o Zubileta Evolution BM Zuazo é “un rival moi complexo e que intentaremos sacar porque para os nosos obxectivos son básicos”.
O partido poderá seguirse, como de costume, vía streaming no Youtube do BM Porriño.
