A aventura do Pontevedra Rugby Club na División de Honor B segue e as melloras no rendemento do equipo xa son palpables. Na súa expedición a Cataluña, as galegas xogaron contra a GE i EG, coa que perderon por 49-0.
“Tratamos de ir corrixindo fallos e mellorando. Creo que xa se pode ver unha evolución en comparación á primeira xornada”, di a capitá do Pontevedra RC, Tere Gálvez.
No seu segundo partido, as Irmandiñas sufriron unha derrota, pero encaixaron moito menos que no debut, case a metade. Unha progresión sobre o céspede que semella que non fixo máis que comezar.
Tere Gálvez: “Tratamos de ir corrixindo fallos e mellorando”
Segundas partes son boas para o Pontevedra
As galegas lograron aguantar cinco minutos co marcador a cero, ata que Uxue Merino abriu o electrónico para o GE i EG. A partir de entón, as Irmandiñas do Pontevedra RC seguiron loitando polo partido, pero sen lograr sumar puntos no seu casilleiro.
En palabras de Tere Gálvez, “foi un partido máis duro do que esperaba nun principio. Elas tiñan xogadoras fortes, que conseguiron rachar coa nosa defensa, o que se notou sobre todo na primeira parte”.
Tere Gálvez: “Tiñan xogadoras fortes, que conseguiron rachar coa nosa defensa, o que se notou sobre todo na primeira parte”
As catalás seguían convertendo ensaios sen que as galegas puideran frealas, e así chegou a pausa, cun 39-0 no marcador, grazas aos tries de Bertille Crosnier (2), Sabine Van de Graaf, Janire Melendez (2), Anna Muñoz, Sophie Magro e Anna Fabrega.
Tras a pausa Alberto Fernández reorganizou ás súas e na segunda metade do partido, as Irmandiñas melloraron o seu nivel de xogo. Se nos 40 primeiros minutos o Pontevedra RC encaixara case unha media dun punto por minuto, para a segunda metade a cifra reduciuse moitísimo.
“Despois do descanso, puxémonos as pilas e centrámonos en axudar ás compañeiras, en apoiarnos dentro do campo”, explica a capitá.
O equipo das galegas vai collendo forma e as xogadoras coñécense mellor, o que se demostra no campo. Na segunda parte, as visitantes estiveron máis igualadas ás locais, que só conseguiron marcar dous ensaios, ambos obra de Uxue Merino.
A mellor defensa non foi acompañada dun bo ataque, polo que o Pontevedra volve de Girona coas mans vacías, pero co coñecemento que aporta unha maior experiencia.
Para a seguinte xornada, as Irmandiñas volven a terras catalás, onde enfrontaranse ao CR Sant Cugat. Polo de agora, as galegas seguen sendo o farolillo da competición, aínda que están a cinco puntos das terceiras clasificadas e queda moito por dicir na segunda mellor categoría do rugby español.
Podes volver vivir o partido aquí:
Ver esta publicación en Instagram
