A COVID-19 tocou indirectamente ao Pontevedra Rugby Club e impediu que disputase a terceira xornada competitiva. Pasado o tempo preventivo de illamento, as Irmandiñas volven ao campo xogando contra o XV Hortaleza RC. O duelo será este domingo, 7 de febreiro, ás 12:30 no debut das galegas na súa casa.
Este será un encontro difícil, pero se en algo destacan as galegas é na súa actitude determinada e positiva. Segundo apunta a xogadora Valle Viñas: “No último adestramento que tivemos no campo puiden notar que só hai unha dirección: cara arriba”.
As polo de agora colistas deberán dalo todo contra o sexto clasificado. O Hortaleza acumula tamén dúas derrotas no seu haber, que se engaden á vitoria acadada contra a AD Ing. Industriales Las Rozas no estreo da tempada.
No bando contrario, as Irmandiñas só puideron disputar dous partidos, cun saldo de dúas derrotas. Ademais, non puideron disputar a terceira xornada, polo que levan medio mes sen competir.
Por todo iso, a meta das galegas esta xornada, ademais de desfrutar do rugby, é estrear o marcador e saír da cola da clasificación.
Este parón forzado non baixou os ánimos no club de rugby galego. Lonxe diso, a paixón segue imperante nas súas filas e o segundo adestrador, Rubén Sanmartín, declara que “seguimos afrontando a Liga con ilusión”.
O Pontevedra RC medra ante a adversidade
Nas filas do Pontevedra RC saben ben como sobrepoñerse ante as adversidades. Un equipo montado en medio da tempada da pandemia, co propósito de mellorar o nivel do rugby galego e co único obxectivo de xogar ao deporte oval, non ía amedrentarse por unha pausa competitiva.
Rubén Sanmartín: “Estivemos adestrando todas xuntas desde casa e iso axudounos moito a mellorar a estruturación do equipo”
“Neste último parón tocounos seguir coas ganas vía telemática”, sinala o técnico. Non hai mal que por ben non veña, así que as Irmandiñas “estivemos adestrando todas xuntas desde casa e iso axudounos moito a mellorar a estruturación do equipo”.
En poucas palabras: “Cada vez é máis difícil atopar un quince titular porque están todas moi motivadas co proxecto”. Segundo apunta Sanmartín, “todas queren puntuar para que o club salga dos últimos postos da clasificación”.
O que tamén mellora semana tras semana é a complicidade e unión dentro do grupo. “En cada adestramento vemos que hai máis conexión entre as mozas, vemos que hai máis núcleos non só formados polas posicións no campo ou equipos de procedencia, senón que se ve máis a un grupo, un equipo”.
Rubén Sanmartín: “En cada adestramento vemos que hai máis conexión entre as mozas (…) Vése máis a un grupo, un equipo”
Superado este “medo” de non ter conseguido formar “unha boa conexión de equipo”, o de menos son os resultados. A esta valoración súmase Valle Viñas.
A xogadora considera que tras o parón, “o equipo está bastante ben porque creo que melloramos un montón. Vexo boas sensacións cara ao partido do domingo. Hai moitas ganas, moita melloría, tanto a nivel persoal como en conxunto”, afirma a Irmandiña.
Viñas coincide en que a confianza entre xogadoras é maior, polo que espera que “neste partido se faga visible a melloría que estamos experimentando”.
Posibilidades de vencer
As Irmandiñas aínda non anotaron ningún ensaio ou transformación esta tempada, pero se mostran confiantes na súa calidade.
A xogadora Valle Viñas analiza o estado no que se atopa o seu equipo, e conclúe que “se repetimos o que fixemos contra GE i EG, e temos un pouco máis de balóns ao noso favor, podemos chegar incluso a gañar”.
Na segunda xornada, as galegas conseguiron frear case por completo ao rival na segunda metade, pero a remontada quedou nun desexo.
Para esta ocasión, Viñas prevé “un partido interesante, moi igualado. Imos tratar de facelo o mellor posible”. Para iso, Alberto Fernández contará con quince deportistas á súa disposición.
Valle Viñas: “Hai moitas compañeiras que quedan no banco ou que nin sequera chegan a ser convocadas. Pero a pesar desa responsabilidade, véxonos con moitas ganas e moita forza!”
A galega estará dentro deste quince titular, polo que considera que ten moita responsabilidade “xa que hai moitas compañeiras que quedan no banco ou que nin sequera chegan a ser convocadas. Pero a pesar desa responsabilidade, véxonos con moitas ganas e moita forza!”, afirma convencida.
Este duelo poderá seguirse vía streaming a través das redes sociais do Pontevedra RC, xa que se celebrará a porta pechada.
“Esperamos poder ofrecer un bo partido aos espectadores e poder darlles alegrías á afección”, declara Rubén Sanmartín.
Ver esta publicación en Instagram
