A aventura comeza para as xogadoras galegas do Pontevedra Rugby Club, que debutarán nunha competición nacional este domingo, 10 de xaneiro, ás 14:00 horas. As atletas galegas recibirán ao Barcelona Universitari Club (BUC), un dos equipos máis fortes da División de Honor B de rugby.
Como novatas na competición, ás galegas fáltalles rodaxe e experiencia, pero lles sobra ilusión e ganas. A súa participación na segunda categoría do rugby español coñeceuse tras a renuncia do Muralla RC a competir esta tempada, polo que as galegas levan preparándose como grupo unhas catro semanas.
O conxunto está formado por 45 xogadoras de distintos equipos da zona sur de Galicia, polo que, malia os escasos adestramentos como equipo, o seu segundo adestrador, Rubén Sanmartín, móstrase positivo. “Ao ser moitos equipos nun, cada un estaba xa adestrando co seu grupo de xogadoras e iso hai que agradecelo, porque todos colaboraron con nós”, declara.
Rubén Sanmartín: “O que máis nos importa é demostrar que a parte sur de Galicia tamén ten nivel para xogar e ten gañas e moita enerxía”
Así as cousas, este será o primeiro duelo das xogadoras como equipo, algo que non preocupa ao Pontevedra RC. “Xogamos polo rugby e para desfrutalo estando todas xuntas. Aínda que sexa o primeiro partido, o que máis nos importa é demostrar que a parte sur de Galicia tamén ten nivel para xogar e ten gañas e moita enerxía. Imos todas xuntas ao que nos poñan como diante”, asegura convencido o técnico.
Rival de altura para as novatas do Pontevedra RC
“Tocanos para o inicio un equipazo, como o BUC, e estamos encantadas de recibilas pero sabemos que están a outro nivel ao que a nos cústanos chegar”, admite Sanmartín.
As catalás estiveron rozando o ascenso a tempada anterior pero, coa cancelación dos play offs por mor da COVID-19, quedaron sen a oportunidade de competir na Liga Iberdrola.
Rubén Sanmartín: “Somos un equipo de distintas partes de Galicia, que queremos xogar xuntas sen importar o rival”
Isto non mina a moral das galegas xa que, como adoitan dicir nos adestramentos, “para saber se son mellores teremos que xogar primeiro. Logo xa se verá o que temos. Somos un equipo de distintas partes de Galicia, que queremos xogar xuntas sen importar o rival”.
Rubén Sanmartín incide en que, como non pode ser doutra forma, plantexan este encontro dunha maneira máis defensiva, sen experimentos, e “cando teñamos o balón facer o que sabemos facer, do que estamos seguras e, cando non o teñamos, que sexa un inferno. Se temos que placar, placamos”, indica.
Ademais, o técnico recalca que están moi contentos co nivel e implicación das súas xogadoras, polo que confían plenamente nelas para afrontar esta tempada tan especial.
Ver esta publicación en Instagram
Debut preto de casa
O primeiro partido do Pontevedra Rugby Club non será no seu campo habitual, onde adestran tres veces por semana, en Monteporreiro. Por motivos de xestión, o partido inaugural teranno que disputar no Campo As Lagoas de Ourense.
A partir do seguinte encontro como locais, as do Pontevedra esperan xogar xa en Monteporreiro, aínda que ao ser xogadoras naturais de distintos puntos da xeografía galega, desprazarse non é un problema. De todas formas, o estreo en casa non será ata a cuarta xornada da competición.
O segundo e terceiro partido competiranno como visitantes, ante dous conxuntos cataláns: o GE i EG e o CR Sant Cugat. Non será ata o 7 de febreiro cando as galegas volvan a casa, para enfrontarse ao XV Hortaleza RC.
O rugby galego estará representado na División de Honor B co Pontevedra Rugby Club
