O alcalde de Pontevedra, Miguel Anxo Fernández Lores, anunciou que se está a traballar na instalación dunha pantalla que permita seguir a final do Mundial de Fútbol que se disputará en Sidney o vindeiro domingo, 20 de agosto, ás 12.00 horas (hora local) e na que xogará a pontevedresa Teresa Abelleira. España e Inglaterra son os equipos que loitarán por levantar a Copa do Mundo de futfem.
“Sabedes que sempre facemos un seguimento de todos os pontevedreses que están en competicións internacionais. Neste intre a actualidade xira ao redor do fútbol feminino, dun xeito claro e cun protagonismo enorme de Tere Abelleira“, indicou o rexedor pontevedrés.
Esto es increíble… !
Espero vuestro calor Pontevedra https://t.co/Yneax1oGM4— Teresa Abelleira (@teresabelleira) August 17, 2023
“Tere é unha xogadora galega e pontevedresa, unha muller que xa foi recepcionada neste Concello para recibir os parabéns de todos os pontevedreses cando pasou a formar parte da selección absoluta”, explicou Fernández Lores.
“É un orgullo ver o papel que está a desenvolver no Mundial e non é algo de chovinismo pontevedrés, calquera pode comprobar que está a ser unha xogadora clave e excepcional”», comentou Lores. “Ao longo destas semanas fun falando con ela vía WhatsApp. Felizmente pasaron a esta final, a competir polo campionato mundial, e só pode ser unha boa nova que unha galega estea xogando a este nivel”.
A pantalla estará na Praza da Ferraría de Pontevedra
O rexedor explicou que se tomou a decisión no Concello de Pontevedra de retransmitir a final do Mundial, “en principio”, desde a Praza da Ferraría, lugar escollido por motivos “técnicos e loxísticos”, segundo explican desde o Concello. “Non sei se será xigante, mais será o suficientemente grande para que poida vela todo o mundo. Estamos artellando o asunto e hai tempo suficiente de aquí a domingo para celebrar que Teresa participará nun feito histórico. Só agardo que poidamos poñer tamén pantallas o día que Teresa participe coa selección galega nalgún campionato internacional”.
A final do Mundial de futfem poderá verse en pantallas xigantes na Coruña
