A Comisión Delegada da Real Federación Española de Ciclismo (RFEC) aprobou na súa última reunión o calendario 2023 da Copa de España de Ciclocrós e dúas das oito probas puntuables celebraranse en Galicia.
A segunda xornada será o Gran Premio Cidade de Pontevedra, o 7 de outubro, e cinco días máis tarde disputarase a terceira, o II Ciclocrós Lago das Pontes. Ambos eventos gozarán ademais da categoría C1 da Unión Ciclista Internacional (UCI).
Por terceira temporada consecutiva o Gran Premio Cidade de Pontevedra forma parte do calendario do certame estatal. Tal e como aconteceu o ano pasado, os ciclocrosistas medirán forzas no circuíto da Illa das Esculturas na fin de semana posterior á apertura da Copa en Gijón. A edición deste ano terá un valor especial ao tratarse do ensaio xeral de cara ao Campionato de Europa desta modalidade que a Boa Vila vai acoller no 2024.
Outro gran reto organizativo asumiuno nos últimos meses o Ciclocrós Lago de As Pontes, sede do Campionato de España do 2025. A proba coruñesa que tan bo sabor de boca deixou na súa estrea a pasada campaña, incorpórase este ano á Copa de España. A súa segunda edición promete espectáculo o vindeiro 12 de outubro.
Así queda o calendario da Copa de España de ciclocrós
- 1 de outubro / XIII Trofeo Villa de Gijón / Gijón, Asturias
- 7 de outubro / Gran Premio Cidade de Pontevedra / Pontevedra, Galicia
- 12 de outubro / II Ciclocross Lago de As Pontes / As Pontes, A Coruña, Galicia
- 29 de outubro / Gran Premi Ciclocros Les Franqueses-KH7 / Les Franqueses, Barcelona, Catalunya
- 5 de novembro / XXX Ciclo cross Internacional de Karrantza / Karrantza, Bizkaia, País Vasco
- 19 de novembro / XI Criclocross Ciudad de Alcobendas Enbici / Alcobendas, Comunidad de Madrid
- 16 de decembro / Ciclo-cross Ciudad de Xativa / Xátiva, Valencia, Comunitat Valenciana
- 17 de decembro / XXVI Cyclocross Internacional Ciudad de Valencia / Valencia, Comunitat Valenciana
