O Concello de Pontedeume organiza a exposición ‘Eume Fontecelta: O berce do fútbol feminino eumés’. Trátase dunha lembranza ao primeiro equipo de fútbol feminino da nosa vila, no ano 1970 que poderá visitarse ata o 4 de xuño, de martes a domingo, en horario de 18:00 a 20:00 horas.
Unha fermosa exposición chea de historia deportiva onde se dará a coñecer a aquelas xogadoras pioneiras que impulsaron este deporte en Pontedeume hai máis de 50 anos.
A inauguración desta exposición tivo lugar onte, venres 20 de maio ás 20:00 horas na Casa da Cultura.
Nesa inauguración estaba previsto contar cunha desas pioneiras, Manola, todo un nome propio do fútbol feminino desta comarca coruñesa. Lamentablemente o delicado estado de saúde da ex deportistas, que ten xa 84 anos, fixo imposible contar coa futbolista. Pili Neira, compañeira súa no Karbo, falaba dela como a “gran capitá”. Nesa inauguración estivo tamén Lis Franco, outra das pioneiras daquel mítico Karbo, e José Mañana, o adestrador destas mullers futbolistas que fixeron historia no fútbol español e galego.
Manola Blanco, tal e como se pode ler nunha das partes que integran a exposición, foi unha deportista coruñesa que “despois de militar no Eume Fontecelta, continúa co fútbol na capital herculina, primeiro no Galicia Gaiteirae, como paso definitivo, enrólase nas filas do Karbo (club que destacou no mapa nacional e internacional) onde retiraríase”.
