A Federación Galega de Natación (FEGAN) organizou o pasado 25 de abril o Campionato Galego de Fondo Máster en colaboración co Concello de Carballo. Nesta competición, o CN Ponteareas revalidou o seu título de campión autonómico quedando na primeira posición na clasificación feminina e na conxunta.
Dentro do equipo de Ponteareas, a nadadora Marta Abreu, en +50, foi o único ouro do club. En segunda posición dos 1.500 m., cunha medalla de prata, quedaron Paula González, na categoría de entre 20 e 29 anos, Loures Melón, en +50 e Leticia Olmo, en 800 m. no tramo 40-49 anos. Os dous bronces foron para Iria García, en 1.500 m. de entre 30 e 39 anos, e para Vero Redondo, na mesma proba pero na categoría 40-49 anos.
Novos récords galegos
Ademais, durante o campionato establecéronse novos récords. Sofía Suárez, do Rías Baixas, bateu a marca en 1.500 m. libre na serie 2 da proba de maiores de 20 anos, cun tempo de 22:13.86. Tamén melloraron marcas nos 1.500 m. Elisa Pichel, do AD Fogar, cun tempo de 19:18.80 no seguinte tramo de idade, e no relativo aos 40-49 anos, Sonia Braña, do CN Liceo, estableceu a marca en 20:46.40.
nuestras nadadoras en el Campeonato Gallego de fondo máster: Sonia oro en 1500 y record Gallego; Cachu plata en 1500 y María bronce en el 800. Tercer puesto gallego para nuestro EQUIPO FEMENINO . 🖤💛🖤💛 #liceomasterteam @Xunta @fdeportegal @igualdadenarede @coruna_deportes pic.twitter.com/st8vTgKZIe
— Natacion Liceo (@NatacionLiceo) April 26, 2021
Pichel foi tamén récord en 800 m. libres, cun tempo de 10:14.86 e Braña fixo o propio na mesma distancia, cunha marca de 10:59.08. Ana Balado, do Pabellón Ourense, logrou o récord galego nos 100, 200, 400 m e 800m. na categoría 50 anos.
Consulta nesta ligazón o listado de resultados ao completo.
